一講起「香港大學民意研究計劃」相信好多人第一下就會諗到特首同官員民望評分，而Jenny就總會諗起董建華時代嘅「港大民調風波」。始終一個地方有一個具認受性嘅民調真係好重要，調查結果可以成為政府施政參考，亦可以鞭策政府。不過，「港大民研」好快就要走進歷史喇，然後計劃總監鍾庭耀遲下就會搞「獨立」？咁大膽？

 

 

 

研究所以後運作靠眾籌

 

　　話說，港大民意研究計劃總監鍾庭耀今日就公布，民研計劃將「脫離」香港大學，原班人馬會成立一個獨立新機構，叫「香港民意研究所」，下個月4號就正式營運。而民研計劃呢，就6月30號正式BYE BYE喇！

 

　　搞「獨立」從來都有代價。今次鍾博士揸FIT嘅「香港民意研究所」，冇咗港大個Backup凡事都要食自已啦！首先未來就要眾籌到600萬做進行啟動同埋成立工作，之後要運作落去亦都係要靠眾籌籌募經費喇！

 

　　數數手指，隸屬於港大社會科學學院社會科學研究中心嘅民研計劃1991年6月成立，而家都有成差唔多28年歷史。大家可能會問因乜解究咁突然話摺就摺？其實都唔突然喇！鍾博士都已經60有1喇，佢同Jenny講港大退休年齡個60歲，上年港大就同佢續多年約，等佢可以同社會科學院院長商討去向，又傾下民意研究計劃點行落去咁啦……傾完一輪，佢就決定3個月之後從港大退休，自立門戶。

 

歷年爭議多 鍾：「無怨、無恨、無悔」

 

　　回顧近30年於港大民研爭議，最經典當然係小妹文首提及嘅「港大民調風波」。想當年（2000年），時任特首董建華個特別助理路祥安口多多，涉嫌向鍾庭耀施壓，要求停止進行特首及政府民調，時任港大校長鄭耀宗同副校長黃紹倫就負責傳話。事件當時引起社會嘩然，皆因咁做係干預學術自由。

 

　　經港大獨立調查小組調查之後，認為鍾庭耀指控屬實，路祥安喺市民對政府支持率下降嘅情況下，希望阻止不利政府嘅民調結果進一步打擊港府聲望。最後，鄭耀宗同黃紹倫因事件宣布請辭。

 

　　講開民研計劃不時遭建制派狙擊，鍾博士同Jenny講佢「無怨、無恨、無悔」，仲話「只要仲係我領導嘅一日，肯定唔會為五斗米折腰！」，會秉持獨立自主的研究精神，不擔心受政治或經濟壓力影響咁話。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情