選唔選特首？陳智思答得聰明有玄機…..

　　今屆政府唔經唔覺做咗差唔多兩年，特首「跑馬仔」前哨戰都差不多係時候開波。特首林鄭會唔會連任？佢本人都未表態，而家已經有唔少人率先話撐佢連任喇！另一邊廂，一直被視為「黑馬」嘅行會召集人陳智思（Bernard），就從未停過畀人問佢「下屆會唔會選特首呀？」

黃志祥四撐林鄭連任

　　嗱！信和集團主席黃志祥前幾日喺北京嗰時，四度話支持林鄭連任，睇嚟真係重要到說三次都唔夠吖！林鄭係咪下屆特首不二之選就仲未知，但 Bernard會唔會去選就好多人想知！佢今日接受港台專訪嗰時，就利申：「自己無能力勝任此職位」

　　Bernard話，今屆政府做咗已經接近兩年，表現都好務實，顯示林鄭嘅執行能力好強，認為林鄭「絕對有能力連任」喎！佢仲話，其實只要知道特首工作要做乜，相信唔少人會卻步，佢就自問無能力勝任㗎啦！就咁聽起上來，對比之前同Jenny傾計時，Bernard嘅口風仍然一致噃！

咁下下屆特首呢？

　　不過留意返啊，記者係問佢「會唔會選下屆特首？」，就算Bernard認為林鄭「絕對有能力連任」，但係特首都只可連任一次。Jenny亦都諗起當年梁振英就曾經話自己「根本唔係搞政治嘅材料」、「N屆都唔會選」，但係一個華麗轉身，就去咗參選。今日Bernard嘅回答都只係講3年後嘅事，可說答得非常聰明，萬一真係有人力邀佢出戰，都唔怕好似梁振英咁畀人拎住個Bite，無限翻舊帳恥笑。下下屆之後會點？Let’s see！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情