港大「首副」譚廣亨同校長不和？ 譚教授趁團拜親身解畫

　　香港大學貴為本港一級學府，學校管理層有咩變動自然大家都好關注啦！話說港大新校長張翔上任無耐，暫任首席副校長譚廣亨上個月就突然話唔Do，即刻流言四起，話係因為二人唔咬弦。與其估估下，Jenny就趁今日出席港大團拜，一於親身去問清楚譚教授！

 

 

 

譚教授解畫：我同校長關係極之好

 

　　回一回帶先，四年前港大否決法學院教授陳文敏出任副校長（學術人事及資源）之後，當時Jenny就聽聞首席副校長個位原本嗰4位人選因此全部「褪軚」，咁當時做緊副校長（研究）嘅譚教授就走馬上任，先做署任首副，再做「暫任首副」（Interim Provost & Deputy Vice-Chancellor ）到而家喇。一直以來譚教授都同傳媒關係好好，聲望都幾高架！所以上個月佢突然請辭，大家都好愕然！

 

　　面對流言滿天飛，譚教授就開腔解畫，話同校長「關係極之好」，強調辭職係同學校有共識，成個決定係因為「擺多啲時間做我至愛嘅科研、教學、臨床工作」咁話，一講起唔使做「首副」佢就表現得好開心，雙眼發晒光咁！Jenny忽然領會到一啲嘢……

 

 

為咗可以令鬼佬教授都可以順利讀出祝賀說話，今年特設黃旗一枝，拎出來嗰下Jenny先係嚇一跳，然後係咁笑。

 

張校長都保持隊形 猛讚譚教授

 

　　嗱！退落來係咪鬆口氣先？譚教授即刻澄清，話唔可以咁講，猛話專注科研係佢一直想做嘅事，第時只要港大需要佢，佢都好樂意出手幫忙，佢一直都喺港大呢座「山」入面，冇話唔會唔再「出山」。對於覺唔覺港大管理層近年政治化咗？對未來新管理層有咩寄望？譚教授就意味深長咁同Jenny講：「大環境係咪最理想，唔係我哋控制得到……但我哋可以堅守到好多我哋重視嘅嘢！」

 

　　至於另一位主角港大新校長張翔都保持隊形呀，係咁讚譚教授係個一名出色領袖，同時又係一個優秀學者，為港大服務多年，明白譚教授有研究要兼顧，所以好理解佢辭職嘅決定。

 

　　講時講吖，張校長上任半年多啲，已經有兩名高層「跳船」，先係副校長（環球事務）高為元去年底請辭，跟住就係譚教授喇！張校長就話人事調動好平常，兩位想有改變都唔難理解咁話。計Jenny話，箇中有咩乾坤就真係當事人先知喇…… 

 

 

同場加映港大超可愛治療太Jasper，成個新春團拜人人都爭住集佢郵。

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情