警隊「一姐」Madam趙「空降」做申訴專員 睇嚟壓力唔細呀！

　　喺任內工作廣受好評嘅申訴專員劉燕卿（Connie），之前話過唔會同政府續約，所以佢嘅任期今年4月就滿喇！Jenny同其他行家都好關注邊個會成為佢嘅繼任人。政府今日就終於公布有關消息啦！

以為係內部擢升 點知係去警隊挖角？

　　政府今日出新聞公報，宣布委任警隊首名女副處長趙慧賢「空降」出任新嘅申訴專員，將會喺4月1日正式上任，任期5年。Jenny之前仲以為會喺申訴專員公署內部擢升添！

　　不過，其實以往嘅申訴專員，多數都一樣係出身政府或者係立法局，反而Connie就係一畢業就係做消委會，一做就做咗38年，由研究主任做到去總幹事，退任兩年之後獲委任做申訴專員。或者係因為冇直接入政府部門做過，做起申訴調查反而更有魄力，佢在任其間啲主動調查數量都翻咗一番。以Connie咁出色嘅表現，Madam趙日後可能好大壓力呢！

佢就係Madam趙喇!

Connie太出色 Madam趙有壓力

　　睇返政府資料，Madam趙本身喺警隊工作超過35年，2017年就啱啱升做警務處副處長，係香港歷來最高級嘅女警務人員嚟㗎！特首林鄭就話有信心趙慧賢會係一位獨立和公正嘅申訴專員，定能帶領申訴專員公署更進一步。不過而家社會對警察嘅印象仍然麻麻，Jenny估計Madam趙上任後，首要工作係省靚自己個名先！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情