收緊長者綜援申領年齡呢個議題發酵咗幾日，爭議唔止冇減退，社會仲愈鬧愈起勁。無他嘅，今次破天荒地令到泛民建制聯手齊反，政府都唔知點拆呢個炸彈好喇！

 

 

羅局長聽完都忍唔住挑一挑眉......

 

人到中年60歲？30都係未成年少女

 

　　今日勞工及福利局局長羅致光就喺電台再講呢個議題，佢就用埋雙重否定句咁話今次個政策「無乜可能唔推」，又話香港比起其他國家已經落後咗，有啲國家嘅退休年齡直情去到67歲添！仲加多句：「當大家都120歲，60歲嘅人係啱啱中年。」咁計法， 小妹年年25歲咪仲係未成年少女一名？以後咪冇得品酒囉！世界末日喇！！

 

　　其實世界上有120歲嘅人又有幾多個？Jenny印象中入到世界紀錄嘅最老人瑞都係122歲咋！唔知局長係咪呢排睇得「長命百二歲」多，以為人人都真係有百二歲？

 

「不食人間煙火」＝四個字？

 

　　局長今朝話冇咩可能「撤」，一眾議員就梗係反你檯喇！適逢今日立法會福利事務委員會開會，大家又係時間向政府發炮。

 

　　其中坐擁大量銀髮族票源、又被林鄭擺上枱嘅建制派就更加要不遺餘力，一於大大聲鬧啦！就好似柯創盛咁，大鬧政府：「坐擁萬億盈餘，佢仲離地提出呢個措施，即等同削減長者福利，可謂極之可恥、極之涼薄。」唔知係咪鬧得太激動，佢下一句就話：「我相信局長或者佢嘅團隊，四個大字，係『不食人間煙火』！」咪住先！1234……56？點樣「四個大字」呀？柯生你先45歲咋，咁快就數錯字？所以「MK文壇大亨」鄺俊宇等柯生發完言，都忍唔住更正：「係六個大字！」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情