【致尊貴嘅中高層】小薯OT時 煩請送個「救命果」

　　香港的打工仔，好彩就朝九晚五，唔好彩嘅起碼朝九晚十。日日困獸鬥匿喺辦公室，相信人人都會有自己的珍藏，係需要時為自己打打氣、醒醒神。而我發現，有一樣嘢普普通通，卻是大部份打工仔情緒低落時嘅安撫良品，佢就係──生果。

 

 

　　唔好睇生果好似平庸無奇，佢的確有種魔力，多次令到公司就快暴斃嘅同事重生。生果入面嘅果糖能夠喺你做嘢做到大腦缺乏營養時，提供糖分，令大家更加精神。阿姐可能深明呢個道理，平時孤寒嘅佢，係大家chur爆、趕deadline嘅日子，特意為大家獻上生果。

 

　　「佢唔係以為請我哋食個生果就補償到啲OT時間吖嘛？」

 

　　「佢咁耐以嚟請過我食一粒Haribo咋，一人一生果算大手筆啦！」

 

　　阿姐亦好似聽到我哋私底下嘅對話：「OT飯錢公司包咗，咁我唯有買啲生果，慰勞一下大家，大家嚟take個break先！」

 

 

　　雖然只係小小一個生果，但請問日日忙到爆嘅打工仔，你對上一次食生果係幾時呢？對於嗰班出咗身、自己住嘅小薯，平時收工攰到死，相信三餐都係隨便買個茶記或連鎖食肆嘅嘢食填飽肚就算，又邊會咁好閒情買生果食呢？

 

　　唔知大家又有冇試過，做嘢做到口渴，但又唔想浪費時間行去pantry斟水？呢個時候畀你咬一啖鮮甜多汁嘅生果，除咗為你解喝叉電、畀到你嘅，仲係一份久違嘅健康感。又有冇人發現，當你做野做到好攰時，咬一口新鮮生果所發出的清脆「索索」聲，其實相當治癒、相當解壓，硬係有一種舒暢感呢。

 

　　點都好，平時身為「萬人敵」嘅阿姐，呢一著「孤寒」派生果的確成功打動人心。雖然大家對阿姐仲抱有無限恨意，但同樣作為捱世界的小薯，呢個「救命果」真係令到一眾小薯精神一振。

 

　　講到呢度，好明顯喇，今星期並非要打花生文，而係想各位尊貴嘅中、高層，假如睇到呢篇文，煩請畀小小人性，買箱生果或生果盒畀班為你搏緊命嘅員工，為佢地叫打打氣又好、refreshment又好。其實有時候上司少少嘅同理心，已經可以為自己條team賺返唔少團隊精神。所以，希望各位管理層，係你無時無刻關注業績嘅同時，抽少少關心畀下面嘅員工！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇