【有無咁離譜？】十號風球，阿姐：「叫佢今日搞掂佢！」

　　上星期「天鴿」訪港，造成2017年第一個十號風球。全港打工仔早上不忘慶祝打敗「李氏力場」同時，都一直Check住手機WhatsApp有冇公司來嘅message。大Group靜英英，反而收到阿姐單機WhatsApp攻擊。

 

　　事情發生於上星期一，公司有位新同事返工。於是阿姐就叫咗我帶一帶新同事，教佢日常要做嘅工作。而newbie好好彩，返咗兩日工乜都未上手就遇到難得一見嘅十號風球，人人休息一天。正當我考慮緊重返周公懷抱，或是立即起身追風慶祝之時，小小嘅我竟然收到阿姐WhatsApp……

 

　　「你教教Crystal點樣準備project A個report.」

 

　　「Project A啲資料係晒公司，佢冇料做唔到喎。」（我心諗：下？而家？搵鬼同你做乜！）

 

　　「你叫佢今日之內做好佢，如果搵唔到車，有需要可以搭的士，安全至上，有乜事你幫幫佢！」

 

　　「哦，好。」

 

 

　　就係咁，Newbie Crystal就係佢享受緊突然嘅假期時，畀我一通電話召喚咗返公司做嘢。不過，呢件事真係令人嬲到出煙！首先，十號風球下，阿姐你自己係屋企「印印腳」，坐喺度嘆世界，但隨便send幾個message，就要班細嘅冒住危險返公司做嘢，真係好攬下屬！如果班細嘅出咗乜事，你良心過唔過意得去？

 

　　第二，點解你要Crystal返工唔自己打電話搵佢，要打畀我，叫我叫Crystal返工？點解醜人就要我做，明明你先係最惡毒下命令果個！相信初來報到，連人事階級都未搞清楚嘅Crystal會永遠記住我，就係迫佢十號波返工嘅元兇！

 

　　第三，阿姐你唔好搞笑啦，乜「如果搵唔到車，有需要可以搭的士，安全至上」？十號風球下，的士都可能冇得你搭，仲點樣搵到其他公共交通工具？唔好講到你賞賜大恩畀Crystal，恩准佢搭的士咁。你要人地惡劣環境下返工，搭的士真係基本囉好嘛？

 

　　最後，Project A個report真係唔趕，到你做咗都冇人會拎黎睇，點解，點解你要迫個新同事打風日內做好佢？其實就算係同其他跨國公司合作，相信佢地都會接受天氣問題遲咗交report。更何況而家個report係完全唔趕、做完冇人睇、仲要係只涉及到本地公司嘅伙伴。咁你咁急要新同事返去做個report畀你，為乜呢？

 

 

　　結局最尾，Crystal等到八號風球變成三號風球先返公司，然後第三日返工就返到一間空無一人嘅Office，一個人默默做野直到夜晚8點。而我？梗係Send 啲template比佢跟，有乜事打電話搵我就算啦！仲想我返公司同佢賣命咩！？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好