到聖保羅又繼續坐

　　終於坐完長途機，前後連轉機差不多三十個鐘，卒之來到巴西聖保羅，為咗睇世界杯，確係要飛到好盡！

坐到腳仔軟先去到酒店，就見到一個疑似世界杯嘅訊號塔。

　　三十個鐘畀你可以做乜？瞓覺？都瞓唔到咁多㗎，咁我當然早有預備，三本旅遊書、五本體育雜誌、仲有幾份報紙，之但係都唔夠燒時間，電影又好多都睇過，好在航機上竟然有條體育頻道，入面有今屆世杯球隊介紹，又有經典球星馬勒當拿甚至籃球之神米高佐敦嘅特輯，加上可能因為呢間航空公司贊助咗唔少球隊，所以仲有唔少平時睇唔到嘅球會每月特輯喎，阿仙奴、皇家馬德里、巴黎聖日耳門都有，咁又燒得幾個鐘嘞！

　　去杜拜嗰一程嘅同機主要係國內朋友居多，梗係去消費啦；不過響杜拜轉機之後，部機入面終於多番好多朝聖球迷嘞，足球氣氛即刻一點即著，最多嘅就係伊朗球迷，當然清一色男士啦，難得隊波再一次入返決賽周，早出發早享受呀；另外亦有唔少澳洲朋友喎，個個春風滿面咁，呢啲風騷球迷心情，我哋班香港小球迷應該唔係咁易明。

　　落機之後眼見新落成嘅聖保羅球場，乾淨明亮，人未算多，當我哋遇見親切嘅導遊哥哥時，心諗終於可以去酒店唞一唞，點不知佢話個好消息畀我哋知：「你哋依家即刻可以上車唞下，因為大塞車，到酒店車程起碼兩個鐘！」

　　噢，又繼續坐！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇