空中飛人

　　呢次巴西世界杯之旅有個與別不同之處，就係飛得特別多、特別遠。香港去巴西冇直航，我今次先坐8個鐘去杜拜轉機，停留幾個鐘，再坐15個鐘去聖保羅，全程就用咗一日有多。難怪開頭有好多巴西fans本來話今屆一定要去朝聖，但一聽到途長路遠，惟有慳番。

 

Gloria（左）上機敷mask未影到，先睇下佢同世杯波飛合照嘅真面目。

 

　　今次我嘅行程係會由開幕逗留到閉幕，由揭幕戰巴西對克羅地亞直到決賽都有得入場，前後會目擊十幾場波！

 

　　其實第一眼睇見個行程表，真係第一時間叫咗出嚟：「正呀！」因為咁大個仔做過幾次世界杯，都未試過現場睇咁多場波，之不過公司同事第一反應係：「小心暈浪呀！」

 

　　吓，又會嘅？

 

　　跟住細心睇下行程，由於巴西地大物博，要穿州過市睇波「既快捷又方便」方法只有一個，就係做空中飛人坐飛機，

 

　　粗略估計我哋隊team每三日就要飛一次，短則一粒鐘、長則三粒鐘，呢鋪儲mileage嚟講收穫應該唔錯。

 

　　要飛來飛去，因為要穿梭聖保羅，馬努斯，福塔雷薩同里約熱內盧，有幾日仲係凌晨要上機。不過我地香港球迷不嬲習慣為咗睇波可以去到好盡，瞓覺呢啲嘢好次要嘅啫，喺香港嘅你，隨時瞓得仲少過我啦！

 

　　家陣臨上機嘅唯一煩惱，就係有咩「細藝」可以過日晨，我嘅拍檔Gloria（鄧佩儀、2013國際中華小姐冠軍）話會把握時間響機上敷mask，咁特別嘅奇景，我會唔覺意影畀大家睇下！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇