十月天，往常應該係微涼，秋雨漸濃，適合行山嘅好時節。但今年香港嘅十月，卻係遇上遲來兼罕有嘅風季高潮，一星期內，先有莎莉嘉，後有海馬，21年來首個十月八號波，又有最遲黑雨，多處山洪暴發，車路變水道。天氣光怪陸離，仿似同香港政局嘅魑魅魍魎互相呼應，更加好似係上天對於種種不公義嘅怒吼，不過，我哋係科學嘅人，凡事追隨共產黨無神論呢個指導思想，甚麼鬼也不怕。

 

　　只不過，撇開迷信嘢唔講，風雨飄搖，正好描述咗呢一個星期好多香港人嘅心情。

 

　　兩個幼稚的新晉立法會議員，以英語宣誓，期間除了加插擁護香港民族的說辭外，在正式誓言當中讀到中國名稱的部分，梁頌恆以「Chi」以非「Chai」來讀「China」，游蕙禎照辦煮碗，更把「Republic」改成粗口，讀成「Re-fxxking」。兩人都帶著寫上「Hong Kong is not China」的藍色毛巾，梁頌恆披在身上，游蕙禎則把毛巾攤開在桌上。兩人都被負責監誓的立法會秘書長陳維安指出其飾物令他懷疑兩人是否明白誓言內容，而宣告無權為他們監誓，而令他們未能完成宣誓過程。兩人讀中國英文名嘅讀法被人指係「支那」，亦即日本對中國喺二戰期間帶有侮辱性質嘅稱呼。

 

　　舉動觸怒香港好多人，包括整個建制派，政府以及左派，兩人辯稱係口音，又曾經指出Hong Kong is not China只係表示A is not B呢個邏輯關係，唔必然係港獨。其實就連佢地本來嘅支持者有唔少都睇唔過眼，主要係指責佢哋回應閃縮，敢做唔敢認。

 

　　呢一星期以嚟，北京一聲令下，要游梁兩人不能繼續擔任議員，港共、政府、土共、保皇傾巢而出，扭盡六壬，玩流會、司法覆核、毀三權分立，等等等等各式各樣奇招盡出。就係為咗「支那」兩隻字？我睇到嘅就未必啦。「支那」二字頂多係俾保皇黨同一眾西環契仔女用嚟拖時間同製造輿情嘅武器，所以，我會形容，梁游二人講「支那」係蠢，我個人唔覺得辱國，好多後生仔唔覺得辱國，但的確督正大部分喺香港經歷過戰爭，或者經常聽自己爹娘點抗戰，點逃難嘅「中國香港人」神經，所以保皇黨就不停針住呢兩隻字要求佢哋做一個法理上唔需要做嘅動作──「道歉」。但用意只係拖時間，「辱華」就唔做得議員？又唔係犯法，又唔係違反基本法，最多只係傷害人民感情，咁樣民建聯馬恩國大律師喺立法會聽證會嗰一句「fxxking Chinese」、外國人參選立法會主席，甚至老毛搞文革，都好辱國喎。

 

　　呢啲龍門任搬嘅嘢，唔係今次嘅法律爭拗重點。

 

　　「Hong Kong is not China」先係重點。大家都知道，呢句口號係來源自西班牙東北部嘅加泰羅尼亞嘅獨立運動，當地人為咗表達加泰羅尼亞同西班牙之間嘅唔同，會大呼一句「Catalonia is not Spain」，希望外界分清楚。但呢句標語係咪就必然代表係獨立於國家呢？呢啲就係咬文嚼字嘅爭議，唔係政府話係點就係點，所以今次要等法庭嚟一個判決。而原審庭法官拒絕批准政府申禁制令阻梁游兩議員宣誓嘅原因，係唔俾佢兩個宣誓可能影響兩人作為民選議員嘅權利，保皇黨最荒謬嘅地方，就係無視呢個判決，立法機關幫行政機關拖時間去向司法機關俾壓力。連司法獨立都受到政府挑戰。

 

　　今次呢件事，中共吹雞，幾乎全世界都跪低，整個勢頭，似乎就係要喺「港獨」出現前，先將香港嘅政治制度摧毀，再建立一套集權體制，連三權分立呢個過去建制派唔敢明言貶低嘅原則，都喺各個護法同護主聲音日講夜講之下，出現動搖。

 

　　明明法律寫咗喺度，兼有案例可循，點解唔可以等埋青政兩位再次宣誓，如果再玩嘢，就由梁君彥裁定無效，再踢佢哋出議會，順理成章。而家咁樣，喺佢哋口中嘅「暴徒」有機會打爛嘢之前，自行焦土打爛晒所有嘢，究竟急咩呢？係咪有港共最高層急於要喺十月做到好成績，去壓住政府內其他想競逐最高層職位，偏向鴿派嘅人呢？

 

　　真係不得而知。我呢刻只係好想講，對於想解決問題嘅人嚟講，呢兩個星期，好難捱。因為當政府自己打爛緊大家守護咗好耐嘅制度，喺靜悄悄之間，政府公開咗橫洲發展顧問報告，冇人理；多宗性侵案被指司法不公，無聲吶喊，理嘅人寥寥可數。大大細細嘅推土機一部部咁推動，推倒家園、一切基業，過埋呢件事，香港仲剩返幾多？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇