周處除三害的故事人人皆知曉，想不到在現代，我們可以重新看見這份氣魄。 

 

　　偉大的港區正苦總書記梁英，上任四年來，香港「百花齊放、風光明媚、政通人和、一帶一路，多次為解決問題，而解決提出問題嘅人；帶領各司局長走過一個個難關，迎難以上；同立法會關係良好，令唔少議員努力出席會議，熱切討論，火花四濺，香港一片欣欣向榮，向心力舉世無雙、前無古人」，難怪佢一直都籌謀要做多五年，繼續大展拳腳。口裡說不，身體卻很誠實，呢排梁英開始認真做事，展現返五年前嘅魄力，仲為自己可能連任之路消除障礙，兼為香港除害，令人感動。

 

　　梁英上星期帶同一眾司長以外嘅幾位官員，到大嶼山清潔海灘，事緣近日本港南部及多個泳灘有垃圾湧上岸。梁英比四年前學精咗，四年前七月，強颱風韋森特襲港，香港掛起十號風球，打風期間，一艘停舶喺香港南部水域嘅中石化貨輪上有六個載滿膠粒嘅貨櫃被吹落海，令香港南部多個沙灘滿佈膠粒，造成「膠災」，直情係海洋生態大災難，當時梁英政府剛上任，對呢件事不聞不問，冷淡回應，民間要自發到各離島執膠粒。到今日，再發生啲類似事件，當然要一馬當先去清潔爭民望啦！

 

　　睇住新聞畫面，梁英將一件件垃圾放入劉江華個口…..唔係唔係，係垃圾袋裡面，大汗淋漓，應該攞分攞到盡啦，點知百密一疏，被記者影到喺佢哋嚟之前一個鐘頭，已經派人將垃圾舖好成條路咁，等長官們嚟到可以喺更快速咁完成任務。佢哋攞住個鉗去夾垃圾嘅畫面，更被前朝新聞統籌專員何安達嘲諷「執得咁高貴，出嚟個效果梗係反面啦」。公道講句，佢肯落手落腳做，即使係一場公關show，都算係合情合理。

 

　　而梁英喺嗰刻，可能係盤算緊香港應該盡快普及簡體字，因為當日所見，啲垃圾嘅包裝，例如膠樽招紙、盒上面嘅字等等，好多都寫上簡體字，亦好明顯係香港人唔常用嘅大陸牌子，唔將簡體字喺香港普及，就令到大家一睇就知啲垃圾喺邊度嚟啦！幾失策呢！梁英亦不得不承認，今次垃圾量倍升，源頭係嚟自大陸，亦都話會同「內地」部門聯絡跟進，以梁英政府幾年嚟「冇做嘢好似做咗嘢」嘅境界同思維去諗，最佳解決垃圾問題嘅方法，就係參考林榮基事件嘅「階段性勝利法」，做好個通報機制，有一件垃圾漂港，大陸就通知港方去海灘等舊垃圾過嚟執走佢，等啲垃圾唔使死得不明不白丫嘛。 

 

　　不過而家南海有主權爭議啦，可能正苦都要考慮同菲律賓建立呢個通報機制，大陸可以唔認數啦yeah！ 

 

　　海洋垃圾呢一害（扮）處理咗啦，第二大害就係「爛到入心」嘅廉政公署，由湯顯明事件開始，民間逐漸有一種「廉政專員不廉正」嘅感覺。四年前，同梁英同日上任嘅廉政署員白韞六當然係同佢呢位「直屬上司」拍住上，好好整頓廉署，捍衛香港嘅「廉潔文化」。

 

　　雨傘革命爆發後兩星期，梁英被外媒揭發上任後收受UGL一筆5000萬港元嘅「顧問費」，事件仿似不了了之。而喺2014年底獲委任做廉政公署審查貪污舉報諮詢委員會主席嘅譚惠珠，今年五月接受電台訪問時曾經講過，特首要連任其中一個條件，就係冇俾廉署查緊。而事實上，早喺2015年1月已有消息指廉署已立案調查梁英5000萬，但唔係公眾眼球嘅關注重點。

 

　　梁英要連任，繼續佢嘅偉大事業，搞好佢自己嘅香港，廉署呢「害」似乎必要除去。署任執行署首長李寶蘭被降職，不能在署任呢個廉署阿二之位，成為回歸以嚟首例。佢之後毅然離任，引起廉署大地震，一場比《寒戰》更加寒嘅風暴就此爆發。亦有內部消息傳出，指廉署執行署近一年嚟係調查緊梁英UGL事件。但多次查問特首辦攞資料都不得要領。消息指呢件事係李寶蘭被降職嘅觸發點。

 

　　但事件嚟到今日，似乎白韞六已經決定要攬上身，強調梁英事前只係獲「知會」而冇就人事變動表達意見，而且話李寶蘭署任一年工作表現未達標，所以要降佢職。嘩，件事係幾咁陳文敏！然後，廉署決定升遷執行處處長丘樹春取代李寶蘭，丘樹春曾涉及喺湯顯明事件中，批准湯顯明宴請賓客嘅錢歸入活動宣傳費用，升佢，件事又係幾咁馮煒光！即係點？勵志！似乎就係最緊要「聽話」，做到咁都有得獲重用，人嘅quality都彷彿唔重要啦。 

 

　　呢一「害」，唔使經過梁英手，(或者經咗我哋都唔知)都除埋。但係梁英始終都搵唔到第三害，點算？但其實，佢暗中已經搞緊第三害。梁頌昕行李事件、廉署呢場風波，更莫論一連串行為令人質疑政府誠信，都俾人睇到梁英為咗揸穩權力，有幾夠膽踩出線外。 

 

　　古有周處除三害，射猛虎、屠蛟龍、（令人以為）犧牲自己。今有梁英滅垃圾、（疑）閹廉署，差一步架咋，差一步整走埋自己，就可以令香城居民，好似義興郡人民以為周處死咗咁，大肆慶祝。 

 

　　梁英除三害，唔使連任嘅，整走自己就得架啦。佢今日未竟全功，祝繼續努力，早日為民除害。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票