2023-11-21
騙棍送「書」(輸),信者無救
過去大半年,小弟有幸,不停被行騙集團睇中,用我個招牌做假網頁,希望吸引水魚入籠劏。
四個月前,騙徒開始不停用我的真樣開行騙網頁,雖然報了警,但一「頁」死,另一「頁」即誕生。
睇見呢類網頁者的反應分三類:(一)精明眼一族,瞄瞄已知網騙,睬佢都傻;(二)見相又真,內容又熟口熟面,有機會真係碌Sir,直接問我堅唔堅;(三)並非小弟長年讀者或聽眾,根本唔清楚我作風,好奇之下,撳入去睇睇,如此,就有機會變成水魚被劏了。
騙局其實好易揭穿,因通常無限地誇張,例如有必勝秘笈(有我仲使捱?)。
劏的手法萬變不離其宗,乃由「假碌Sir」提供必勝貼士,通常細價股。當水魚一買,「假碌Sir」小財唔出大財唔入,會同時掟十幾萬將隻蚊型股掃高,向水魚顯示眼光神準。一次兩次之後,水魚多會上釣,見「好易中,好易買餐餸」,咁就一於聽晒「碌Sir」指示,連棺材本都可能抬出來買「必中貼士」。
結果當然被「放血」!
冷靜觀察騙徒集團,算相當勤力,網頁寫到似層層,版面更不停推陳出新。
唯一經常穿崩,為網頁多簡體字,肯定寫手為內地人,故唔識用小弟的廣東口語筆法,有時又傻吓傻吓將我個名變為「曾志華」,真符碌。
必須承認,騙徒極勤力,不停推陳出新,永不食老本。
一批邀人入局網頁玩盡後,上周開始,又有新創意—— 「碌Sir」送書!
![](https://img.etnet.com.hk/column/images/stories/347/2023/11/04.jpeg)
我除報警外,也在有12萬粉絲的個人社交平台大力踢爆及警告。
其次,我為乜免費教你投資之道?好得閒乎?這是善舉乎?
![](https://img.etnet.com.hk/column/images/stories/347/2023/11/05.jpeg)
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票