2023-05-09Photo: 圖片由作者提供
機械人:激嬲老婆點氹返?
潮流興講AI及ChatGPT。好,等我又趁熱鬧玩下先。
幾年前,科技大學老友H教授,開始認真地瞓身,千方百計希望研發出一套「必勝贏馬術」,正是透過AI,每場以人工智能度四隻馬,然後四串六買Q。
眾所周知,AI是透過收集大數據再分析。咁,你估H教授戰績如何呢?哈哈,「長跑」結果係同我一樣——得個桔。
人工智能出現,改變人類世界。
因為,AI每場俾出的貼士,與所有大眾報紙提供的「例湯」(例牌貼士),根本無兩樣。即只計你知我知的Factors。但一場馬,受在明在暗人士操控,再加上意外多,你可知有幾多variables足以改變賽果?答案:無數!所以,AI貼中的,必是大熱,冇味。根本提供唔到廿倍以上又中的馬。
AI不是萬能,例如貼馬,用盡大數據,仍十貼九輸。
所以,我跟咗一輪都無奈拜拜了。
好嘞另一個ChatGPT又如何?
ChatGPT雷霆萬鈞之勢出現。
見到家中的「肥女B」久不久玩,我又請佢替我「求籤」:「喂,肥女,可否替我問問,若果激嬲媽咪(成日都會!),點氹返佢呢?」
問ChatGPT得罪老婆點搞?
肥女揸住個手機篤篤篤,篤一大輪之後,懶懶閒話:「肥爸,你自己睇中唔中嘞。」
一睇,唔……呢個就有料到嘞!佢首先安慰我:「聽到你激嬲太太,真的遺憾。如今可做的,是盡力大家溝通,希望明白佢為乜唔高興!記住,要打開耳朵聆聽!更要用同理心理解佢感受!嗱,以下是可能幫到你解決問題的方法:
一、誠心道歉!承認錯誤,包括言語或行為上的錯誤。
答案是「阿媽係女人」——認錯!
二、主動聆聽!給充分時間太太逐點講出不滿,盡力理解佢立場及角度。若要問,盡量精簡,必須讓太太完成發言,切勿中途打斷!
三、同理心。一定要讓太太知道你明白佢感受,並且,已經為導致種種不快而內疚,慚愧。
四、為錯誤負責。孭起所有導致不快責任,承諾用行動去彌補自己所犯的過失。
五、決心改過。請求太太提議改善方法,然後發誓未來日子會遵照一切而行。
六、迎合太太需要。假若太太需要獨處及空間去平復情緒,一定要配合。總之「要乜俾乜」。
ChatGPT最後的忠告:「記住,修補一段關係,必須付出誠意,努力及耐性。總之,要全心全意為解決問題而專注投入,不可動搖。」
睇完,拍拍手,講得非常非常之好。
不過,自己又回心一諗,夫婦磨擦,若老公錯,當然應該做足上述六項啦。
咁,假若老婆錯又如何?你估有冇香港妻子會同樣做足以上六項的呢?
從不需要認錯,因我「永遠是錯的一方」!
好,又問問ChatGPT先……想問之際,肥女B已似一陣風消失。
咁,等我答啦——發夢冇咁早!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票