上次寫下「1500萬去檳城過天堂式退休生活？」，竟引來不少廻響，連多年無見面同學仔（四十五年有多）「排骨A」，亦來電約晚飯，話要親身陳述佢「千三萬過半退休生活」詳情。

　

　　一見面，A哥已笑不攏嘴，開枝法國靚紅酒，興奮地介紹：「阿碌，前星期你在經濟通《我要退休》專欄寫肥偉四千萬過退休的事，哈哈，我用三分一，即千三萬已掂呀，你可以在專欄公開！」

　

　　「排骨A」三年前退休，當時揸住一間太古城七百呎單位及三百萬股票加現金，正在煩惱唔夠食過世之際，有日，拖住老婆去旅行，過咗深圳，試坐和諧號，一個站就到樟木頭，落車後走入城，發覺甚多地產代理公司，望望櫥窗不禁大叫：「唔係嘛，二百萬可買到千幾呎優質豪宅？」

　

　　好奇之下，推門入內，經理見「財神」到，熱情招呼，帶A哥夫婦即時睇樓盤，發覺，大量豪宅，百幾二百萬已有交易。A哥即時心動，睇中一間遠望青翠群山，千五呎已有豪裝單位。因上手為室內設計師，故裝修用足靚料，非常有品味。即日扑鎚，一百九十五萬人仔成交！

　

　　實在太興奮，扑咗鎚才記得問：「點解會咁平㗎？」

　

　　原因簡單又話長，從前樟木頭甚多工業，有不少外商居住，亦為香港退休人士天堂。後來中央決定來一招「騰籠換鳥」政策，將勞工密集及污染工廠遷走。但樟木頭領導不似東莞其他城市，牙力不足，於是，工廠有出，但新生意冇入，成個樟木頭謝哂，了無經濟動力。於是，廠商及專業人士紛紛離開，只剩下草根居民及不少退休者。

　

　　中產人士走後，大量中高檔豪宅空置，紛紛以跳樓價出售。基於此處無甚經濟活動，當打年青及中年人當然不會在此買樓定居，於是，不少急欲放樓者一再劈價。

　

　　排骨A食到應，回港將太古城單位賣出，揸住千三萬，調二百五十萬到樟木頭買樓。餘下留五十萬現金，另一千萬持有三隻股票，港鐵(00066)、港交所(00388)及領展(00823)。一如肥偉，只買不賣，長揸食息，因掃得早，如今升值不少兼有六厘息率（因入貨價平！）每年收息六十萬。

　

　　「阿碌，六十萬一年，即五萬一個月，在樟木頭，點使？首先，唔買車，因市內大把出租車，廿四小時隨傳隨到，十幾廿蚊人仔一程。請個工人，二千人仔。朝朝飲茶，晚晚燉湯靚雞，黃昏帶狗仔散步。資訊封鎖？冇有怕，我識翻牆兼用香港電話咭上網，乜報紙都睇到！重有，通街「番梘碟」鋪，五蚊隻，最新香港上畫電影都有齊，哎吔，其實，想買正版碟係—冇嘅！內地政治我冇興趣，只有興趣過自己喜愛的安逸生活，哈哈哈，幾正㗎！」

　

　　小弟又如何？因屬「鹹水魚」，覺得生活在香港這個「海洋」才會有生命力及參與感，故絕不考慮肥偉及排骨A的所謂「退休天堂」生活。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好