疫巿保就業，給打工仔3大職場投資建議！回報可能比投資股票更高！

　　香港好多打工仔都有做不同投資，買好多書、上好多課外班、做好多資料搜集，希望喺公餘時間為自己財富增值。但相反，肯為自己職場投資嘅人反而少。其實職場上都有好多值一得大家投資嘅地方，只要定期做少少功課，最後投資回報可能比投資股票還要高。

定期面試

　　唔好等有需要搵工時先去send CV，平時亦要養成一個見工習慣，就算工作順風順水，都不妨去見下工吸收面試經驗。面試技巧係談判技巧之一，面試能力強除咗有助見工之外，長線對其他工作如演講、銷售等十分有幫助。而真真正正嘅面試，先能夠令你獲得較好嘅經驗，透過面對不同HR職員、上司同老闆，能令你知道自己工作上或面試上嘅不足。另一方面，你亦可以喺面試中了解巿場行程。好多時自己只顧於現職公司努力工作，好易會變成井底蛙，多「探訪」其他公司能了解巿場對人才同技能嘅需要，檢討後再喺現公司作出相對調整，令自己更有競爭力。再者，如果該公司提出面試機會，證明已初步接受你嘅申請同expected salary，其後如果面試情況樂觀，亦表示你喺巿場上可以有更好嘅位置及人工，令你更清晰喺公司將來嘅定位。

第二技能

　　喺公司專注自己嘅工作係好事，但如果要比別人跑得快，就不能只做一件事。喺香港工作，做好份內事只能滿足老闆基本需要，能夠身兼多職係最好不過。擁有多一項工作技能，就算公司 / 部門裁員，多技能嘅你永遠都能站於安全線之上。不論部門以外嘅技能，甚至同自己工作行業相關嘅技能，長線對自己晉升好有幫助。甚至係同現在工作完全唔相關而有用嘅技能，能夠令你於突如其來嘅疫情、行業倒閉潮，都有較大嘅安全網。但要注意一點，必先處理好份內事，才專注其他事務，否則就會變成「多管閒事」。

商業新聞

　　大部分人習慣上Facebook睇新聞，多數只集中睇時事新聞，但就缺乏「商業新聞」。除咗係自己行業相關新聞外，其他行業亦不能忽視。例如公司同公司間嘅新合作、某公司開設新生意/ 副線、某公司推出破格創新嘅marketing campaign等等，都能夠擴闊自己嘅眼界，亦能訓練自己嘅商業意識同敏感度，對工作或交際應酬十分有用，令自己不停進步。

　　疫巿搵工難，保就業更難。喺逆境下作好準備，增強自己嘅求生技能，令自己更有競爭能力，之後就可以比別人跑得更遠、更快。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇