【質vs量】職場上都有「邊際效益遞減定律」！開會愈多，新idea愈少！

　　如果價錢一樣，你會選擇食一杯高級雪糕，定食三杯中級雪糕？當然係冇一個絕對嘅答案，每個人對「質」同「量」嘅重視程度都唔同。但大致相同嘅係，每當數量愈多嘅時候，多數消費者嘅喜愛 / 享受程度就會相對地慢慢減低，呢個就叫邊際效益遞減定律。

　　邊際效益遞減定律係一個經濟學嘅概念，消費者購買 / 使用一件產品 / 服務時，如果數量 / 次數不斷增加時，開始慢慢習慣產品 / 服務所帶來嘅快樂，當第一次對產品 / 服務嘅期待得到滿足後，往後所得到嘅「快樂」就會隨之而下跌。

　　例如你去日本餐廳叫一碟高級刺身，職員話第二碟有七折，第三碟更有半價。不談論你肚皮是否承受得到，但第二碟、第三碟刺身所帶畀你嘅滿足感必定會大減。而餐廳都明白呢一點，所以先會以減價作招徠，希望吸引你繼續消費。不論係同一次消費多件刺身，還是下次消費有折扣，原理亦大致上一樣。當然一定有例外，如部分喜歡食自助餐嘅人，要「食足兩人分量」先有滿足感。但其實佢哋嘅滿足感已經由「質」變成「量」，追求緊另一種快感。

　　其實該理論亦可以套喺辦公室內，例如公司每日用3-4個鐘開brainstorm會議， 討論「如何在疫情下幫公司賺錢」，希望開會愈多，新idea就愈多。但實情係，同事所提出嘅新idea會一次比一次下降，當老闆所得到嘅新idea愈來愈少時，老闆就會因為冇新嘢而決定「明日再續」，出現惡性循環。所以老闆一係就減少無謂嘅會議，一係就當會議進入第二、三、四日 / 小時嘅時候，老闆應該要以兩倍時薪作招徠，先能夠令會議更有效率。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票