【CEO的薪酬秘密】人工大公開！有種老細只有一蚊年薪？

　　其實「CEO」呢三個字，係一件既遠且近嘅事，年薪雖然上百萬，但能力未必值咁多。值嘅，可能係佢當年成為CEO嘅運氣。

　　老細幾錢人工，相信永遠都係每個同事心底裏嘅一個問號。如果想知一個普通同事幾錢人工，可以從佢嘅消費習慣中搵到蛛絲馬跡，但有錢人嘅消費習慣根本係冇pattern可言，非正常人嘅思維去洗錢。打工仔會兩個月日日帶飯儲錢去旅行，但佢哋唔會有儲錢嘅concept。有一日突然買咗部車，你唔會知佢係用自己銀包嘅錢買，定係入公司數。所以佢哋月薪／年薪有幾多？係一個好難答嘅問題。

　　「老細」大致可以分為三類︰「上市公司老細」、「打工嘅老細」同「全資擁有公司嘅老細」。上市公司嘅老細年薪有幾多，其實可以喺年報或招股書上搵到答案。早年有調查指，香港上市公司老細平均年薪為一千萬左右，即月薪八十萬或以上。佢哋有啲會以月薪形式出糧，有啲就先有月薪，後加每年花紅，但平均計月薪都有一百萬，唔同行業情況有異。亦有啲老細會用股份代薪，名義上年薪一蚊，但換來股份或者其他東西。而美國嘅上市公司老細全球人工最高，平均年薪約一千四百萬美元。

　　另一種老細，就係「打工嘅老細」，意思係呢位老細只係某國家嘅CEO／MD，佢哋之上仲有大老細或者地區嘅MD。平均計算，一位香港區嘅CEO／老細年薪大約一百三十萬或以上，即月薪十萬左右，視乎公司規模、行業、個人能力而定，跨國公司多數可以去到二百萬年薪，當然仲未計算公司股份或者其他benefit等。

　　全資擁有公司老細嘅人工較難估計，因為佢哋月薪多少，好多時都係自己決定，可以係月薪五萬，但年尾花紅就幾百萬，或者月薪十萬但冇其他花紅。有時佢哋嘅人工亦因某啲情況而有所改變，舉例，可能因為公司發展需要營運資金，有啲老細會選擇唔出糧／出好少糧，然後將部分人工注資入公司換來股份，過幾年先再收成，又或者搵新投資者注資，賣股份套現。

　　所有公司計算同事人工嘅時候，都會用「槓桿」作參考，一個價值二萬蚊人工嘅中層同事，如果佢嘅槓桿係「2」 的話，該員工就應該要幫公司賺到四萬蚊嘅營利。可能你會覺得，老細一個星期只會出現一、兩次，出現時都只係簽幾個名、開兩個會就閃人，人工根本唔值呢個價，更談不上槓桿。其實「CEO」呢三個字，係一件既遠且近嘅事，年薪雖然上百萬，但能力未必值咁多。值嘅，可能係佢當年成為CEO嘅運氣，所以大家先學做CEO嘅同時，亦要等待運氣嘅來臨。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇