【你還耿耿於懷嗎？】放下包袱！3件職場初哥最介意的事！

　　因時代嘅轉變，多數人打工都以買樓為目標，令剛剛出嚟做嘢嘅青年人對工作都較為進取，希望努力工作及早脫貧。雖然係咁，好多時職場初哥都會因為一啲耿耿於懷，而令自己經常「用錯力」，浪費咗精神同時間喺一啲唔應該上心嘅事情上。後來操之過急嘅心態令自己走咗好多冤枉路。以下3個耿耿於懷唔知大家又有冇遇過？

 

1. 介意學歷

 

　　有啲初哥好介意「學歷」，一係就介意人哋唔知自己有幾勁，好想比人知自己係名牌大學嘅畢業生，一係好介意比人知自己唔係喺外國大學畢業，經常會收收埋埋，怕被其他同事比下去。所以有啲打工仔畢業後工作2-3年，就開始有進修嘅念頭。進修當然係好事，但都要對準目標先好行動。一般而言，如果唔係一啲特別嘅工種需要指定牌照／專業資格，或者某啲大公司需要碩士或博士學歷先可以升職的話，進修呢個念頭其實可以放後少少。而且當你工作幾年後，學歷慢慢會變得冇咁重要，轉工時老細都未必太在意你邊間大學畢業，佢哋嘅視線會集中於你工作上嘅成績。始終讀書需要唔少嘅金錢同時間，所以進修呢個問題，當你真係肯定有呢個需要先好行動，如果唔係，不需太著急。

 

 

2. 介意工作機會唔夠多

 

　　現今職場競爭非常大，比我哋叻嘅人亦比我哋更加勤力，所以而家職場上要爭取機會，好多人已經再唔係談論「勤唔勤力」、「交功課準唔準時」，而係講「要更加勤力」、「要更快交功課」，因為「準時」只係「做得到」，但唔一定係「做得好」。雖然社會對員工嘅要求愈來愈高，但公司對職場初哥嘅期望一般嚟講係冇咁苛刻，不過如果大家心水清，呢個其實係一個契機。

 

　　記得好多年前自己仲係小薯嘅時候，跟過一位要求極高嘅上司，佢要求同事唔只要做得好，而係做到「超級好」。所以由果陣時開始，佢話星期五要交功課，我都習慣咗星期三就會畀佢。因為如果我星期五先交，果一刻上司只能夠「睇」，而唔能夠「改」。但如果我早兩日交，就可以攞comment完後仲有時間執。自此之後，每當星期三交完功課，就會收到另一份新功課，亦因為咁，往後得到嘅機會亦比人多。

 

3. 介意問太多問題 

 

　　如果喺試用期中問太多問題，好易會比上司覺得自己冇用，有時情願死做爛做，最多做錯咗由頭嚟過，都唔想問上司，但其實咁樣係好錯，最後只會引來反效果。試用期嘅作用除咗係比時間僱員同僱主了解雙方之外，仲喺比員工呢段時間了解工作內容同公司運作，如果因為太在意別人嘅睇法而失去呢個本意，試用期就變得冇意思。當然每個上司都希望下屬係一個話頭醒尾嘅人，但就算你更醒目，都未必能夠喺短時間內了解公司運作。所以一般情況下，如果你唔係每日都好似第一日返工嘅同事咁，不停問一樣嘅問題的話，多數上司真係唔係介意你喺試用期內問問題，佢哋情願你喺呢三個月內問晒所有事情，之後就完全自動波，總好過過咗試用期先嚟重複犯錯。

 

　　剛剛出嚟做野，總會遇到好多問題，但千萬唔好比自己有太多包袱，咁先能夠令自己呢張「白紙」寫得更多。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇