2016 Marketer 薪金回顧

　　12月中，你最常聽嘅說話就係「攞埋年尾份Bonus閃人～」，我知我知，你一定會話「首先，你要有Bonus」。但要走得瀟灑，係咪真係咁容易呢？

 

　　可能對好多打工仔會講，2016年係艱難嘅一年，帶飯嘅依舊日日食番琴晚嘅餸頭餸尾，用都會票嘅都繼續提醒自己日日記住用。對比之下，嚟緊2017年我諗可能會更艱難，因為大家只要睇睇人民幣眨值就會估到，來年加薪情況同埋自己嘅人工，都會同人民幣一樣一齊眨值。記得上年尾我做咗個小小嘅Research，研究咗過去幾年打工仔嘅人工同加薪情況（2015打工仔薪金回顧），咁今年又如何呢？

 

　　以Marketing呢一行計，今年大家平均加薪大約4%-5%，跑贏所有行業嘅平均數3.6%。2016年嚟講，由Marketing Assistant到Marketing Manager嘅平均人工分別係，MA $11,760，ME $17,568，SME $20,560，AM $25,280，MM $33,029。你可能即刻「嘩」一聲，之後再搭多個單字嘅粗口，所以我都要係度包下底，某程度上年資、際遇等等都會同人工掛勾。當然啦，少過$20K嘅SME、多過$11K嘅MA亦大有人在～

 

（相片來源 : domestika) 

 

　　當中SME同AM嘅人工加幅比其他職位為高，而MA就加得最少，都「好似」係合理，因為中層嘅人佢哋有經驗同年資，如果佢走咗又要Train過新人太麻煩，所以要留人就一定係加多少少。而對比Inhouse Marketing嘅ME，廣告公司嘅Executive就人工大約多一千蚊，有$18,815。但諗深一層，你除返時薪去計，廣告公司嘅Executive其實時薪係超級好勁低。另外，雖然話個市麻麻地，但都有75%嘅受訪者有Bonus或者Double Pay或者兩樣都有（兩樣都有真係霸氣）。而我同你，咪就係另外25%嘅果班人囉.....

 

　　接下來呢個Research都幾抵死，所有行業嘅受訪者當中，大約有23%嘅人每日偷懶約1-3小時，2%每日偷懶4小時或以上，即係話公司有75%嘅人忙到連厠所都冇得去嘅時候，就有多達2%嘅終極冗員係度Hea爆。

 

　　而佢哋偷懶時又做啲乜？上網Hea必定係最多呀，但原來都有9%嘅人出咗街Shopping，4%嘅人去咗做Gym，14%嘅人上網搵工，7%嘅人去咗見工，7%嘅人去咗「呼吸」。原來去食煙嘅人數同去見工嘅人數係一樣，即係話每當有一個人出去食煙嘅同時，就有一條友去咗見工，唔怪之得咁多人工作好辛苦時，就要去「呼吸」啦～

 

　　其實每個人工作時偷懶都有自己嘅「原因」，而轉工都係一樣，唔好因為「人工嘅高低」或者「有冇Bonus」而走人，好似我成日講，有啲嘢錢係買唔倒。大家都係Marketer，大家都係一班懂得「計劃未來」嘅專家，善用自己嘅技能，為自己來年做一個好好嘅Marketing Plan，幫自己贏一個最好嘅Package～

 

　　（資料來源 : JobsDB）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇