2020-10-01
【相學大優勢】菲傭角色大轉移!「飛上枝頭變鳳凰」的套路是怎樣?
這是一個女人騰飛的故事,是被另一個女人的直覺、八卦和師奶邏輯發掘出來的。
偵察出故事脈絡的「師奶」是我朋友,住半山獨立屋,全職做靚太,由於生活缺乏太大起伏,特別注意鄰里瑣事,是該區的「新聞署長」。數年前一晚,她煞有介事地對老公說:
「喂喂喂!我覺得對面間屋即將有大事發生!」
「乜嘢事令你咁興奮?」老公問。
「嗰間屋即將有角色大轉移!」她答。
「你講清楚啲。」
「平日咪菲傭倒垃圾嘅。」像所有偉大的偵探,她的線索都是來自日常生活點滴。
「梗係喇,唔通你見到外星人倒垃圾咩?」老公問。
「唔係,係個鬼佬老細倒垃圾呀!」
「好出奇咩?或者工人放咗假呢。」
「唔會,我明明見到菲傭出出入入。仲有,已經一連兩星期,由單一事態變咗常規。」
「咁即係點呀?」
「個菲傭一路升緊呢囉。」
「我唔明。」老公一頭霧水。
「呢個菲傭三個月前上工。我都話有嘢睇㗎啦!佢胸口咁低、熱褲個叉開得咁高!」
「我絕對冇睇過。」老公急急自證清白。
「我話有嘢睇,唔係指胸前嘅事業線呀,係指真嘅事業升級轉營呀!佢即將由工人晉升為夫人!」
「我唔信!」
「鬼佬最近大包小包咁棒住啲名牌女裝手袋同衣物返嚟,你估畀邊個吖?」師奶舉證說。
丈夫堅決不信,認為是太太神探上身。誰料不久,菲傭大了肚,隨即和老外結了婚、誕下雙胞胎、請了兩位菲傭。還有,據悉在其鄉下買了一個度假村、兩個橡膠園、三個農場。
有一次我在電梯碰到她,察覺到她鼻頭有肉、鼻孔不朝天、顴鼻也頗相襯。還有一點,她嘴邊常掛微笑,據悉鬼佬本來脾氣極臭,從前幾個月就炒一個菲傭,但我女朋友說:「呢位姐姐成日笑口噬噬,老細講乜,佢都話Yes Sir。」
笑得甜、相又靚、加身材正,演活了飛上枝頭變鳳凰的套路。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇