【2018生肖運程】狗年到，這些生肖要注意

　　2018戊戌年大部分生肖都比較平穩，就算嗰D沖正或揩到嘅，大都有吉星打救。

 

　　今期講吓D要留神嘅生肖。

 

肖狗

 

　　屬狗嘅人有狗仔性格，忠於朋友、講義氣、夠長情。佢認定你係朋友，就天長地久、hea住唔走。我有D狗朋友，隔一兩個月就搵我食飯，仲送椰子油、暖頸巾畀我㖭，幾窩心！

 

　　不過佢地桃花幾旺，魅力四射，尤以雄犬為甚，所以做佢地朋友可能好過做佢地女朋友！

 

　　普通嚟講，佢地責任心重、溝通能力強、事業不俗。不過有D孤芳自賞，信自己，有時比較孤傲不群。

 

　　在本命年中，凶星有「劍鋒」、「伏屍」，聽起嚟都幾嚇人，其實係要小心利器，慎防受傷，恐有少少血光之災，可以去洗吓牙、捐吓血，應咁D。又要小心是非暗箭，避免與人衝突，尤其是唔好同上司反枱。錢財方面，大出大入，理財要好小心。幸好有「歲駕」同「華蓋」星照住，自有助力，逢凶化吉。而且可以發揮才華、展現風采。

 

肖龍

 

　　同狗一樣要以和為貴嘅係龍仔，因為今年沖太歲，而且冇吉星照住，宜事事小心，有口舌、破財之兆。凶星有「大耗」，即駛大咗，仲有「蘭干」，即障礙賽，喻示有阻滯，尤可能要承受來自公司高層嘅壓力，有時焗住上，或孭黑鑊。今年喺做生意上唔好打擦邊球，恐有官非。健康方面，小心肺腎同跌親。不過都有D助力嘅，祇要保持低調一於忍、隱、慎啦！

 

肖牛

 

　　另一隻要接受挑戰嘅生肖係牛仔，佢嘅挑戰在於要護住自己嘅背脊，因為有「勾神」，易受暗算、牽連、出賣，又易有是非，總之今年幫人要有限度，逢親要孭上身嘅，例如要簽字嘅commitment，都要耍手兼擰頭。吉星有太陰，會有貴人助力，仲有「天乙」同「國印」星，皆可助牛仔更上一層樓，前者指可創業或置業；後者指進修增值，皆可裝備自己、自強冇死！祇要自強不息，今年會有好成績。

 

肖羊

 

　　羊仔一樣有「天乙」貴人，可以創業、買樓。亦同樣有是非。無辦法啦，今年刑太歲！招惹是非之餘，亦容易有唔開心事，甚至白事。幸好有「天德」、「福星」、「八座」等吉星射住，會順利過關。不過狗年可能做到隻狗咁，其實愈忙愈好，應咗頻撲。必有攪作。

 

　　以上生肖，都可以戴個兔仔牌，最好係木嘅，例如檀香或其他香木做嘅，搵唔到就戴綠玉嘅，邏輯係取其與自己生肖五行可合而化火或半會木局，可有救應，下期談其餘生肖。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇