【玄學花生】梁振英會連任嗎？

　　上周七一遊行，叫梁振英下台，於是梁特首會否連任這議題，又再一次火起來。此時此篇，相信緊貼社會脈搏。

 

　　先此聲明：本文題目嚴肅，內容吹水。

 

　　想寫這題目很久了，但有位朋友勸我：

 

　　「唔好寫啦。費事俾人攻擊，有危險㗎！」

 

　　「唔會掛。吹吓水都會俾人郁？而家又唔係寫國家機密，只係講少少玄學花生啫！」

 

 

　　決定下筆，不只因為訪問了兩位高人，還因為他們的觀點有趣、個性也colorful。一個黃色、一個黑色！

 

　　黃色非關色情，乃指政治。好意先生是佔中支持者，不過佢冇瞓過街，因為自知骨頭頂唔順，佢只係巡視咗現場一周之後，以二流價錢去歎一流下午茶點心。

 

　　這位熱血中年毫不猶疑地說：

 

　　「梁振英必下台！」

 

　　「論據係？」

 

　　「係個名，振英吖嘛。」

 

　　「震英啫，又唔係震中！」

 

　　「英字入面有個央字吖嘛，即係梁振英做啲令中央震怒嘅事，阿爺會叫佢落台。」

 

　　我仲未攪通此中玄機，究竟梁生做咗或會做啲乜震中嘅事呢？

 

　　不過另一高人，則持相反意見：

 

　　「佢應該連任，因為佢紫微斗數嘅盤，啲好星著哂燈喎！」

 

　　由於本篇乃花生初探，無謂羅列化祿化權化科嘅星，攪到你頭暈眼花。我首先研究個盤嘅真實性。

 

　　「你點知佢個盤？係咪全部起哂十二時辰嘅盤，再逐一驗証？」

 

　　「係呀。」

 

　　如此說，即係可能有誤差啦，因為：

 

　　第一：出生日期不知是否準確；可能記錯；可能報錯。

 

　　第二：就算準確，十二個盤中有啲可能相似。

 

　　咁即係靠估啦。好咧，呢位高人往績如何呢？

 

　　佢鍾意著黑色，預測也黑暗。幾年前佢話我睡房流年風水認真差勁，會令女主人生癌，於是我即刻轆出街買咗間百幾呎嘅斗室，準備避難。（此「室」現在沽出，應賺一筆，所以佢係我恩人，帶挈咗我收緊租。）不過當年因有風水大師佈陣，所以我冇搬到，亦冇死到。此事因有「外來勢力」介入，所以我唔知佢準唔準！

 

　　咁我又點睇梁振英連任呢？

 

　　就如似好多政客政棍一樣，我口說絕對客觀，實則絕對騎牆！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇