2023-09-28
職場女王Son姐 | 面對職場不公事件,為何不敢發聲做鵪鶉?Hea答Say Yes有用嗎?
次次都係有我講冇大家講,今次搞搞新意思,同大家玩下情境題。如果你是一位在公司做了超過10年,自問一直好盡責好努力好認真工作的員工,可是非但沒有得到認同讚賞,還一直被上司老闆挑剔投訴指責,最終忍無可忍,寧願祼辭都要走。在安排handover交接的時候,老闆要求分開每個項目每件事分別拍片做紀錄。即時你會有甚麼反應?你會拍還是不拍?
這位員工雖然非常不忿和憤怒,認為荒謬無理之極,但即場啞忍沒有表態,氣沖沖send message問我意見。以下是我原汁原味的回覆:
『你都已經決定唔做,你仲理得佢咁多?盡責任handover 所有嘢就算,要求你拍攝直接say no就得啦!拍咗之後你講過嘅嘢畀人哋無限輪迴攞嚟繼續玩你,推卸責任,唔係估唔到係唔係?你竟然唔係直接say no?』
我得到的回覆是:『明白。謝謝你的回覆我Hea答佢OK。但我唔會做。』我唔明,點解要Hea答話OK之後唔做?大家明唔明?當事人之後又再send多一個message補充:『我嘅轉數冇Son姐咁快!』我繼續唔明,和轉數快慢有甚麼關係?大家認為呢?
接下來和大家改玩推理,這位員工在老闆上司的眼中,會是一個怎樣的員工?一個即將離職的員工,應承了交接會做的事,結果冇做,老闆上司同事下屬會點睇呢?
我無法明白為甚麼到了今時今日,一張大學畢業證書都證明不了甚麼的時候,依然有很多人離職的時候面對種種不公,不敢發聲做鵪鶉,是因為怕得罪公司,不肯出Reference Letter,更甚者怕被寫衰。如果一張Reference Letter有這樣大的影響力公信力的話,手拿一張讚到自己天上有地下無的的Reference Letter,豈不天下無敵分份工手到拿來?
老老實實,如果需要的是廉價的圍爐取暖式的同情呵護的話,搵我問肯定搵錯對象。大人大姐,做人做事處世的原則底線,自己的存在價值意義是甚麼都搞不清楚,每件事都是自己的選擇取捨,後果自負不是最正常的嗎?
所以性格就是命運,別人如何對待你,是因為你容許別人怎樣對待你。明明開口Say no就得,選擇Hea答Say yes都是Yes!Yes完之後唔做就是失職就是玩嘢,全公司上下都知,如果被人拿這件事來做Reference四周圍講,鐵證如山百詞莫辨。
趁周末這個長假期,我的說話雖然難聽,忠言幾時都逆耳,但肯聽肯學肯改肯醒,日後職場行走唔使咁委屈。低頭做事抬頭做人,做個有身價嘅員工,唔係廢柴,唔做怨婦,唔做鵪鶉!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票