十．一，北京同香港非常相似，似嘅地方得一樣，就係「京師」同香港好多地方都去不得，香港更慘，出咗街可能屋企都返唔到。

　　先按下中五學生被警察槍傷事件唔講住，因為有建制老友噚日喺北京來電爆料，話國慶香港團入面，噚日最熱門話題竟然選舉。老友指出，噚日示威嘅暴力再一次升級，令到建制派更加熱烈討論取消嚟緊11月舉行嘅區議會選舉，佢地亦相信，呢個係政府肚入面一個非常熱門嘅選項。

　　老友嘅推斷不無道理。佢指出，建制喺嚟緊區選都幾悲觀，據聞連第一大黨民建聯，都已經有「投降輸一半」嘅心理準備。輸選舉唔係大問題，都唔係未輸過，但老友話，輸得過分慘烈的話，會被演譯為香港市民對警方投下不信任票，咁樣對阿爺、對政府都係非常難堪，與其係咁，唔選可能壞處係無咁多。

　　不過講一句取消區選好容易，但之後嘅影響都唔好話唔深遠。首先，取消咗區選的話咁現任議員屆滿，邊個填？兩個選擇，一係緊急法延續現有議員嘅任期，但延幾耐又係一個好大嘅疑問；第二個，由得佢出缺，變相廢咗區議會。

　　兩種做法都好有問題，特別係涉及區議會嘅其中兩個舉足輕重功能：揀選委選特首同埋選立法會嘅6個議席。如果用上面第一個方式，同一班人繼續做，最大問題係明年立法會選舉咁會點搞？係唔係由同一班區議員互選一位同由其他爭超區？會唔會對一啲想從今年區議會埋手再進軍立法會嘅人唔公平？第二個方式就仲騎呢，任由區議會出缺，咁立法會6個議席又點搞？所有事都係牽一髮動全身，並唔係輕鬆一個決定就可以定。

　　建制友人就話，呢兩個方法其實喺建制之中都早已經有人諗過度過，但估計都唔能夠行落去，最大可能就係先將現任嘅區議會同立法會以「非常手法」延期，一年、兩年甚至係延一屆，都唔係無可能。Tina即時問呢位建制朋友：「咁樣做會唔會刺激更大民憤呀？」朋友答曰：「依家民怨都夠晒勁啦，仲有得再差咩？」Tina無言以對……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情