喺2017年6月30日寫呢篇稿，的確有啲百感交集。Tina唔係因為回歸20周年而有咩特別感覺，而係終於為結束5年「振英之治」而鬆一口氣。

　　「振英之治」嘅一個特點，就係引入內地官場最鍾意嘅鬥爭文化，透過搞鬥爭去為自己爭取最大嘅政治利益，呢一方面，CY喺香港的確係首屈一指。而CY搞鬥爭真係鬥到去最後一日。

　　喺6月29日政府公布梁振英治下最後一次授勳名單，真係睇到唔少朋友都眼火爆。第一「爆」位，係未拎過任何勳銜嘅恒隆主席「梁粉」陳啟宗，喺大家都諗唔到佢除咗浪澄灣君臨天下賣樓賣足十幾年之外，對香港有咩特別貢獻之下，仍然獲頒授大紫荊勳章；第二爆，就係任內民望極低、就連建制派議員都唔敢盲撐佢嘅教育局局長吳克儉，亦都獲得金紫荊勳章；第三爆，係誤打誤撞接咗曾俊華個位做財爺嘅陳茂波，同樣未對香港有重大建樹，一樣係等住拎大紫荊。

　　Tina聽聞，唔少政界中人見到份名單，都真係要唱返首Twins嘅名作「眼紅紅」。本身唔係梁粉，當然就無得眼紅其他拎荷蘭水蓋嘅人，但據聞有位都算係重量級嘅政界人物，任內為CY都擋過唔少箭，雖然未被外界視為梁粉，但竟然連續５年都無獲授勳，相反份量差唔多嘅政壇元老就榜上有名，心情真係唔多靚，仲要強顏歡笑出席習大大閱兵，我諗唔止眼紅，個心仲滴出血。

　　CY鬥嘅氣質真係入型入格，林鄭獲選為下一任特首之後，CY已經多次同林鄭唱反調。

　　Tina仲聽聞，兩人喺近呢幾個星期內一次出席公開場合之前，一齊喺貴賓室之內逗留，兩人竟然都無互相打招呼，絕對係零交流，可以見到兩人交惡程度絕對唔輕。但以CY嘅好鬥，會唔會連下一屆政府嘅施政都要插手干預呢？無十成都九成半喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好