2024-04-09Text: 娛樂組
炎明熹19歲生日前夕派新歌《還有一艘救生艙》賀壽!MV與男主角頭貼頭超甜蜜:唔會覺得尷尬
將踏入19歲的炎明熹(Gigi),生日前夕推出全新作品《還有一艘救生艙》慶生,今次新歌更採用了全新班底炮製,曲、詞由KW朱敏希包辦,編曲及監製有小彤賴映彤。今次拍攝MV跟男主角有不少親密的鏡頭,A0的Gigi竟然是零尷尬?果然大個女!
Gigi提到今次新鮮的合作,她表示:「好開心可以喺佢哋身上學習更加多嘅嘢,當我第一次聽到呢首歌嘅時候,第一個反應係『嗯!呢首歌,好聽!』,同埋我好鍾意份歌詞,雖然只係一份DEMO詞,但我決定原汁原味保留,因為個內容好打動到我,我仲係第一次睇歌詞睇到喊。」對新歌「一聽鍾情」,Gigi更首次大膽地向監製提出編曲上的想法,她說:「因為歌詞有提到外太空,所以我將幾個意見話咗俾小彤聽,尤其我想喺首歌嘅前奏部份,俾人一種好遼闊同空曠嘅感覺,小彤都做到,好感謝佢接受我嘅意見。」
除了首次參與編曲,Gigi更加在MV裏奉獻了多個第一次。今次MV的故事講她與男友長期分隔異地,但對方卻背著她另結新歡,事件最終被Gigi發現,令她心如刀割。導演要Gigi拿著手提電話,幻想與男主角對話,此時Gigi的淚水決堤式滑落、雙唇不自覺地抖震,呈現了被感情出賣的那份痛。「開拍MV前,導演已經同我講咗一次個故事,雖然我冇經歷過,唔可以話身同感受,但至少拍MV時俾到我一種纏綿、開心、幸福嘅感覺,當然我哋嘅男主角 Timothy好帶動到我入戲,我亦冇諗過會喊到出嚟,平時一係喊唔到,一係就谷住咗,feel到要喊,但又冇眼淚,所以今日係好幸運嘅一天。」
除了以上因素,原來當時手機顯示的時間,也觸動了Gigi的淚線神經。「其實手機都有好大嘅幫助,因為當我想打電話嘅時候,個時間咁啱係『520』(國語:我愛你),所以一望到就喊。」Gigi說。第一次拍MV淚崩,也是Gigi第一次拍MV與男主角如此親密。雖然《還有一艘救生艙》是一首悲慘情歌,但導演加入了大量二人甜蜜的拍拖畫面,包括在無人的街上拖手擁抱、在電話亭互餵蛋糕,還有到遊樂場玩滾軸溜冰,但最搞笑是原來Gigi與男主角Timothy從未玩過滾軸溜冰,兩人根本舉步難行,更遑論要在鏡頭前談情說愛,最後導演讓他們脫去溜冰鞋,穿上襪子在場內「扮溜冰」,兩人才鬆一口氣,在鏡頭前展現頭貼著頭的甜蜜畫面。「上次拍《Only For Me》MV跳華爾滋,我覺得已經同男主角好近,估唔到今次更近,算係一個新嘗試,同埋大家投入咗喺戲入面,所以唔會覺得尷尬,或者有唔舒服嘅地方。」
至於在拍攝時,不時見到Gigi忍不住笑,她解釋:「其實我笑點比較低,我忍唔住笑唔係因為尷尬,係自己搞到自己笑,例如剛才我見到男主角出軌嘅訊息,對方留言話:Do You Want Me?再加埋個心心emoji,我一見到就笑咗,覺得好肉麻,同埋我平時影相,啲人叫我俾心心,我係唔會做,因為俾心心我覺得有啲尷尬,所以剛才一見到就笑咗出嚟。」未拍過拖,但要在MV內代入一段Long D關係,Gigi於是問人甚麼是Long D,她笑著說:「原本我唔知係乜,但我問過人,原來係一段異地戀嘅關係,我唔知自己將來會唔會接受,但暫時我覺得係可以接受,因為未經歷過呢種情況,可能都係一個好處,因為日日見好快會厭,但隔一排再見就可以有新鮮感,大家不妨留言話我知,分享你哋嘅故事俾我聽。」Gigi炎明熹全新作品《還有一艘救生艙》,4月8日正午12時叱咤樂壇首播,同日晚上9時推出MV,4月9日凌晨於各大音樂平台上架。
轉載自: 晴報
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇