2023-07-03
演《隱門》獲觀眾好評 阮浩棕遺憾聽不到嫲嫲梁舜燕讚美
劇集《隱門》上周大結局,飾演黃智雯弟弟的阮浩棕,表現獲觀眾好評;雖然不少人以新人形容他,但其實他已入行十年。阮浩棕出身於演藝世家,祖母為已故藝人梁舜燕,但他沒靠關係,從加入藝員訓練班默默耕耘,感恩近年獲不少機會,但遺憾已聽不到嫲嫲的讚美。
阮浩棕在《隱門》的演出獲觀眾讚賞。
阮浩棕在《隱門》的戲份貫穿全劇,他坦言收到劇本時大感壓力,「我明白機會非常難得,一定要好好把握!經驗話畀我知要放鬆,但難免有無形壓力。拍攝時,我覺得自己過分謹慎同小心,後來拍多幾部劇集,再睇番《隱門》演出,就覺得自己太緊張。」緊接《隱門》播出的新劇《靈戲逼人》亦有阮浩棕演出,他自覺慶幸,「今年入行第十年,仍然有好多觀眾唔識我,成日都話呢個新人幾好。其實我做新人都做咗十年,但明白離開過TVB,過去值得留意嘅作品唔多,觀眾未識我係正常不過。」
阮浩棕與嫲嫲梁舜燕感情要好。(IG圖片)
阮浩棕出身於演藝世家,嫲嫲是已故資深演員梁舜燕,爸爸是著名導演阮惠源,二叔阮惠熊及姑媽阮曼莉亦做過演員。阮浩棕從小已甚有表演慾,「媽咪預咗我會行呢條路,所以同我約法三章,無論我做咩都好,讀完大學再諗。到我決定入行,我第一個話畀嫲嫲知,仲記得自己講過一句,『希望將來唔被人嗌我係你個孫,而你係我嫲嫲!』幾咁心高氣傲!」後來,他幫手籌備梁舜燕入行60周年晚宴,過程中了解嫲嫲的過去,才反省自己原來不知天高地厚,「我實在好大膽,能夠做到佢嘅一半?唔係,就算係做到佢三分之一,已經好厲害!」
難忘《EU超時任務》嫲孫合作
想到離世的嫲嫲,阮浩棕不禁眼濕濕,「啱啱入藝訓班,我最希望三代同堂合作,雖然做唔到,但拍《EU超時任務》似圓咗半個心願,因為可以同嫲嫲合作,絕對係最美好嘅回憶!嫲嫲對我影響最大,幾個孫入面佢最錫我,諗番真係好多遺憾。由我入行開始,每次演出,嫲嫲都會讚,周圍同人講我係佢親孫,好叻仔演得好好,但我無接受佢嘅讚賞,因為我覺得我做咩佢都覺得好㗎啦!好遺憾依家我終於有少少成績,但再聽唔到佢嘅讚美。」
嫲孫在《EU超時任務》的珍貴合作,令阮浩棕畢生難忘。(IG圖片)
17年,阮浩棕一度離巢北上發展,後來重返無綫,戲份漸漸增多,除了《靈》劇,還演出《異空感應》及《非常檢控觀》。他坦言演藝路未算一帆風順,幸好靠過去經驗慢慢鋪墊,逐漸成長,希望將來的作品能讓觀眾滿意。「我會觀察自己有咩不足,希望慢慢改善,(想做男主角?)我相信任何演員都想做主角,希望有循序漸進嘅過程。」
阮浩棕在《隱形戰隊》飾演奸角鏗少,開始受觀眾注意。
轉載自: 晴報
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票