2022-07-07
鼓勵後輩盡快開紅館騷 張敬軒夾萬攞名錶贈馮允謙
【晴報專訊】馮允謙(Jay)一連四場九展個唱前晚圓滿落幕,Jay邀得張敬軒(軒仔)任尾場嘉賓。誰知軒仔竟在台上割愛,即場除下珍藏多年的IWC名錶送給Jay,令全場譁然。軒仔寄語後輩:「珍惜時間,把握機會,紅館見你!」令Jay驚喜又感動。
上月,馮允謙曾擔任張敬軒的紅館個唱嘉賓,當時Jay送上兩張親手繪畫的九展個唱門票。軒仔前晚投桃報李,為Jay的尾場個唱任嘉賓,二人合唱歌曲《愛斯基摩人之吻》。軒仔在台上表示準備了禮物:「今朝(前日)起身特登開夾萬攞出嚟,呢份禮物好有意思。」說罷,他除下手上名錶,幫Jay戴上:「我08年首次踏足紅館開三場騷,當時係人生第一次收到咁大份收入,所以買咗隻好出名嘅手錶送畀自己,我決定今晚(前晚)送畀你!」
軒仔送上名錶給Jay,更親自為對方戴上,果然是好哥哥。
軒仔送上名錶給Jay,更親自為對方戴上,果然是好哥哥。
Jay回禮鬧笑話
軒仔笑言絕非植入式廣告︰「呢隻IWC錶款已經過咗季、斷咗貨,我戴住佢綵排過好多次紅館演唱會,好長時間係我人生中最貴嘅錶!已經幫你(Jay)上晒鏈同抹咗油,較好晒時間。」軒仔語重心長寄語Jay︰「希望藉住呢隻錶話你知,我哋呢行好現實,長江後浪推前浪,珍惜時間,把握機會,我喺紅館見你!」Jay感動得攬實軒仔說︰「我一定會加油!」
軒仔在台下化身小粉絲舉牌支持,令Jay深受感動。
Jay不忘禮尚往來,送上一個金色球體︰「好似一粒栗子,好得意,搖下有聲,佢有個啷啷!」軒仔聞「啷」色變,即講有味笑話,令全場爆笑;他又忍不住取笑在外國長大的Jay:「你自己中文唔好,做乜搞呢啲gag呢?」Jay完騷後受訪,坦言軒仔送錶令他十分驚訝︰「佢好錫我,一直好似大哥哥咁照顧我,唔知點報答佢!」他表示會將名錶放入夾萬︰「如果上紅館我一定戴!公司有計劃幫我入紙,希望快啲有結果。」
Jay收到貴重禮物大感驚喜,表示要好好珍藏。
Jay一連四場個唱叫好叫座,令他對進軍紅館舞台信心大增。
軒仔心痛後輩
釗峰與軒仔昨日凌晨突發開直播,齊齊向Jay送上鼓勵說話。(IG截圖)
另外,軒仔昨日凌晨與C AllStar成員梁釗峰齊齊開IG直播,原來釗峰前晚也是Jay個唱的座上客,直播甫開始,軒仔取笑釗峰睇完演唱會心心眼,釗峰即說︰「不嬲心心眼啦,Jay Fung喎,你無心心眼?」軒仔回應︰「我呀,要拖地呀!」軒仔又大談舊事︰「我好心痛呢個人(Jay),因為合約問題浪費咗幾年,我都好想幫呢個人,佢應該要發光發熱。」
轉載自: 晴報
【你點睇】本港無人駕駛自動車最快本月底試運,你會否乘坐?► 立即投票