2022-02-17
《鐵拳英雄》唐詩詠驚變高手大開殺戒 路師傅吳家樂︰唔止芊芊一個殺人機器
【晴報專訊】熱播劇《鐵拳英雄》將於後晚播出兩小時大結局,劇中謎團逐漸解開,繼前晚芊芊(唐詩詠飾)忽然夜襲小柔(劉穎鏇飾),揭露她原來「好打得」;路師傅(吳家樂飾)昨晚更進一步揭示真面目,疑似劇中big boss。昨日家樂接受本報訪問時僅預告︰「呢幾晚好多角色會死,亦有已經死咗嘅人回歸。」劇情峰迴路轉。
慘被神秘人操控的唐詩詠昨晚繼續大顯身手,以一敵眾。(網上截圖)
曾製作《城寨英雄》、《使徒行者》等話題劇的金牌監製文偉鴻,其新作《鐵拳英雄》上周收視達22.4點,劇情已步入高潮。前晚第25集,一直是隱藏高手的芊芊大開殺戒,輕易以八卦掌殺死小柔,對未婚夫步青雲(陳展鵬飾)同樣不留手,打到對方頻頻吐血,要父親路師傅代女兒叩頭認錯。不過,路師傅逐漸展現真面目,自稱武功被廢的他竟是終極強者,他更安排高手硬闖唐仁街搞風搞雨,觀眾估計路師傅正是最終big boss。此外,神秘角色劉佩玥仍未登場,令劇迷熱切期待。
預告結局篇死得人多
吳家樂昨日回應時,堅拒透露自己是否big boss︰「老婆問我我都唔講,網上有唔同揣測,呢兩晚路師傅繼續出手揭示自己喺唐仁街嘅目的。」他指劇情將死得人多︰「有更多角色死得淒慘,除咗四個高手之外,好多人會破壞唐仁街安寧,亦有已經死咗嘅人回歸。」是否指步青雲父親步天下?他對此不置可否。提到如何控制黑化的芊芊殺人,家樂稱︰「究竟發生乜事變成咁,點解佢突然變奸?安娜(王君馨飾)又亦正亦邪?大家繼續猜測芊芊身世,總之唔止得芊芊一個殺人機器。」他又解釋︰「我哋拍攝時都唔知big boss係邊個,即使有劇本都係邊拍邊改,好似之前《城寨英雄》、《同盟》咁,監製文偉鴻有好多諗法。」
陳展鵬被取笑「不死身」
吳家樂為路師傅一角操出鋼條靚body,昨晚一集中終展現成果。(IG圖片)
前晚一集,陳展鵬被唐詩詠連番重擊而不停吐血,但仍只受輕傷。(網上截圖)
家樂坦言為路師傅一角落足苦功,為了保持鋼條身形及應付動作場面而無啖好食。至於神秘角色劉佩玥,家樂暗示對方在大結局當晚才登場。有網民狠批劇中以電視城古裝街扮唐仁街「太流」,他表示︰「19年拍攝時原本去泰國拍外景,可惜因有變化飛唔到,要喺古裝街搭個唐仁街出嚟,都無辦法,但大家都畀心機做。」另外,有指步青雲被芊芊狂打依然無大礙,如有不死身,昨晚陳展鵬回應︰「做演員只能盡量配合令觀眾投入,劇集情節上係有bug位,有啲網民覺得我哋似Marvel電影咁,希望遲啲嘅彩蛋令觀眾滿意。(步天下是否回歸?)唔會,但拍咗咁耐都唔記得,其實我真正個妹都未出現,芊芊同big boss咩關係?劉佩玥有乜關連?總之嚟緊幾集都有彩蛋。」
19年拍畢的《鐵拳英雄》播出時間一改再改,幾經波折才於上月重見天日。(IG圖片)
轉載自: 晴報
夏日中暑高風險!即睇中暑迷思+預防措施!► 立即了解