2021-08-13
保錡@ERROR被昔日好友爆桃色事件 韓子亮︰佢唔辣㷫我我都唔辣佢
【晴報專訊】ViuTV男團ERROR今年爆紅,成員吳保錡人紅是非多,今年初曾被指背住前度女友暗交女星張沛樂(沙律),昨日又被昔日好友、男歌手韓子亮(TL)大爆涉及桃色事件。聲稱掌控保錡「食女」證據的TL,昨日接受《晴報》訪問時爆料︰「保錡會喺屯門河邊飲酒flirt女(調情),有七個女仔曾被佢氹上床!」
保錡與韓子亮早年因「搶咪事件」結怨,當時二人結伴出騷,TL因手上的咪高峰失靈,忽然搶去保錡的咪。近年保錡在節目《ERROR自救TV》上曾舊事重提,更播出當年搶咪短片,明抽自己被TL搶咪的黑歷史,更搞笑稱因此事而患上「咪高峰恐懼症」,令TL耿耿於懷。昨日,TL忽然在IG密密出限時動態大反擊,指「香港某組合成員涉嫌迷姦」,直斥對方是「港版吳亦凡」。及後,他在另一動態中聲稱有七個受害女性準備爆料,更刻意tag了保錡,並要求保錡公開道歉,又聲言:「你準備退出娛樂圈。」
保錡與TL曾是好兄弟,經常傾心事,一身打扮襯到絕。(受訪者提供)
TL自言擁有大量保錡的黑材料,令花生指數急升。TL及後聲稱有人致電要他滅聲,他亦自揭患情緒病,並寫道︰「如果我真係死咗,我做鬼都會返嚟搵你哋!」足見他對保錡充滿怨氣。TL爆大鑊後,昨日受訪時透露多達8,000人湧入其IG食花生,他對此亦始料不及。TL講述自己「大反擊」,全因不忿保錡不停重提搶咪舊事抽水,又認為保錡的抽水做法,變相「策動」fans攻擊他︰「演唱會播剪輯同醜化我嘅片段嚟『招呼』我。」TL又指ViuTV刪除《ERROR自救TV》中提及他的一集,所以他重po片段到自己的IG限時動態,他聲言:「ViuTV咁大公司都刪片,唔係身有屎點會咁!」不過,昨日所見ViuTV網站仍有該集供觀眾重溫,並無刪片。
在《ERROR自救TV》中,保錡攞兩支咪唱歌,明抽自己「黑歷史」。(網上截圖)
爆有人致電迫滅聲
TL在社交網tag了保錡,呼籲他向七名受害女子道歉。(IG截圖)
TL狂呻不停被保錡抽水︰「佢唔辣㷫我我都唔辣佢,對我好唔公平。佢IG(直播)爆粗,公司都唔雪(藏),都可以繼續食女,點解啲咁嘅人都可以放生佢,唔係我搞死佢,係佢食女搞死自己。」TL更愈爆愈多︰「好多同佢有過節嘅人嚟搵我,有七個女仔被佢氹上床,佢喺屯門河邊飲酒flirt女,我聽到都O晒嘴。」TL透露正搜集證據,準備集合多名受害者一起站出來。
保錡當年演出時,被TL搶咪後只懂傻笑。(網上截圖)
苦呻被保錡欺凌
保錡昨午如常工作,相信心情未受太大影響。(IG截圖)
不過,記者追問TL在IG指「香港某組合成員涉嫌迷姦」的字句,他即「戴頭盔」,反口指從沒指明是保錡︰「呢個係一個好嚴重嘅指控,驚爆料嘅女仔到時反口唔認,就到我惹禍上身。」本報曾就事件聯絡保錡及其經理人,至截稿前未獲回覆。
轉載自: 晴報
【你點睇】有健身中心宣布全線暫時結業,議員指巨額預繳式長約並不合理,你日後若「入會」會更留意邊方面?► 立即投票