捐血救人莫遲疑！今日立法會就舉行捐血日，畀一眾立法會議員同埋職員參加，不過唔知係唔係因為天氣凍，同埋一陣嘅林鄭質詢時間，朝早一開始得公民黨陳淑莊（Tanya）同埋新民主同盟嘅范國威（咖哩飯）嚟捐血，未見其他議員出現噃！轉頭民建聯柯創盛都嚟咗，但係……

 

 

 

Tanya定期捐 獲贈襟章好Happy

 

　　首先打頭陣就係身型最窈窕嘅Tanya，Jenny都一度懷疑以Tanya大風啲都吹得郁嘅身型，會唔會唔畀捐㗎？Tanya就同Jenny講，自己一直都有定期捐血，不過就只可以捐細包（350cc）。佢話睇返記錄，今次應該係捐第17次，而自從發生大埔車禍後，自己就開始好準時咁去捐血，上次捐應係9月左右，今日捐完就獲贈一個「定期捐血者」襟章，令佢非常開心！佢仲透露，自己之前多數去銅鑼灣嘅捐血站，佢同嗰度啲姑娘吹水時，姑娘就話佢知，原來唔少印傭喺放假時，都會同佢哋啲同鄉一齊去捐血，所以佢哋都係香港一批好穩定嘅血液來源嚟㗎！Tanya覺得好難得，亦都好多謝佢哋！

 

梗係要自拍打個卡先啦!

 

 

咖喱想望望鞋底，點知下一秒「反艇」，差啲成個人跌落地。

 

柯創盛被姑娘DQ

 

　　捐血日呢啲加分位，點可以只係得民主派出現㗎？其實民建聯嘅柯創盛（柯仔）都有嚟，仲要一入嚟就拎起張Banner影相打卡添！點知佢連基本測試都過唔到，要被DQ！原來佢呢兩日有幾聲咳，估計係感冒初起，姑娘基於風險管理，叫佢都係唔好捐住！咁又係嘅，而家啲流感咁勁，比著係Jenny都要DQ你喇！柯仔記得戴返個口罩先好開會呀！如果唔係傳染埋其他人，再進一步加重醫療體系負擔就唔好喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇