政府唔夠幾日又「跪低」！死死地氣撤回「三隧分流」議案 皆因XXXX

　　上星期全城爭議嘅收緊長者綜援申領年齡措施，政府最後「跪低」，拋出補救方案安撫返最受「銀髮族」擁護嘅建制派；不過炸彈又點會得一個吖！今個星期政府本身打算提交「三隧分流」無約束力議案去立法會求「十卜」，但係又遭到建制泛民齊夾擊。咁嘅情況，點數都數唔夠票，咪只好「跪低」囉！幾時再交上立會？帆哥又問極唔答啵！

 

 

 

朝撐晚撤 政治一日都嫌長 

 

　　今朝運輸及房屋局局長陳帆（帆哥）先喺電台節目入面口口聲聲話「只要有一絲希望，都會繼續努力遊說」。點知過咗半日Jenny就收到消息話撤回方案，果然政治一日都嫌長！

 

　　卒之，帆哥下晝就見記者，真係改口，話「三隧分流」喺議會有好多爭議，所以聽日政府唔會提出無約束力議案（即係撒回）喇！Jenny就喺度諗，議會其實就冇咩爭議嘅，因為大家一直都係反對加價嘅方案，有爭議嘅似乎係政府同立法會之間喎！

 

　　就好似民建聯（民記）嘅陳克勤咁，佢話政府做呢個決定係經過理性分析、審時度勢，「撤回好過硬闖」。睇嚟民記今次又有得「成功爭取」喇！再次跳起Yeah！

 

帆哥「不能說的秘密」

 

　　今日撤回，咁到底幾時先再交上立法會呢？或者對於帆哥來講，呢個係一個「不能說的秘密」。記者係咁追問，佢就係咁迴避，淨係話政府目標係喺2020年1月1日完成修例嘅程序，又話而家撤回，時間就會更加緊逼；政府會喺呢一、兩個月內繼續積極全面遊說議員。

 

　　Jenny一聽就諗，唔通佢暗示政府一、兩個月後就會再次交議案上立法會？但係，之前傾左三個月都冇成果，帆哥又哪來的自信，覺得一、兩個月後議員就會回心轉意呢？其他行家都齊齊追問，帆哥當然又做錄音機—答非所問啦！

 

事必有因 四個大字－－XXXX！

 

　　帆哥話喎，其實議員大多支持三隧分流呢個方向，只不過係喺收費上有分歧，有空間作「求大同存小異」嘅妥協。但佢又補咗句，妥協要建設喺政府與西隧公司傾好嘅協議基礎上。Jenny照字面理解，咁咪即係減價冇得傾囉？似乎求嘅「大同」，都只係西隧公司和政府嘅「大同」喇！

 

　　唉！Jenny見政府呢排出乜都撞晒板，都咪話唔無奈，唔通真係流年不利？但其實大家諗深一層就知背後操作唔係咁簡單啦！四個大字－－選舉近了！邊個仲會夠膽支持加價？唔怕得罪市民咩！有咩都係留返選舉之後先講啦！Right？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票