【一秒上車】唔想再租屋，幫人供樓？ 一個社會現象教你快速做業主

　　相信香港9成打工仔都擁有同一個願望，就係「我要做業主！我唔要再幫人供樓！」。但生活充滿挑戰，有啲人唔食唔洗幾十年先夠錢畀首期，有啲人甚至一世都未必上到樓添……咁灰嘅野都係唔好講，不如講吓啲喜氣洋洋嘅野好過喇！早前，同事突然積極睇樓，唔洗幾耐，仲神速上埋車添。究竟有咩驅使佢要即刻成為樓奴呢？原來大有故事！

 

 

　　話說同事一向都係同老公做「租租」，即係幫人供樓、畀業主恰嗰班。就係幾個月之前，長達兩年嘅生、死約完結，業主順便加租。同事覺得加幅唔合理，而且業主「冇計傾」，同一個價錢，係同區可以租到更靚更新嘅屋苑，於是決定同老公睇樓搵地方搬。嗱嗱嗱，講到呢到，同事都係冇諗過要買樓架。咁大家就會好似我咁諗：「係咪睇睇下樓覺得好煩，又唔想每兩年就煩一次，所以萌生買樓頭啊？」傻啦，同事呢個煩惱我真係第一次聽！

 

　　「睇樓、搬屋麻煩係麻煩，但買樓真係咁易咩？突然邊有咁大舊錢拎出嚟畀首期啊，仲要以後個個月用半份糧都供樓喎！」

 

　　「人人目標唔同，冇父蔭嘅我地又真係好難上樓嘅，咁你做咩無端端加入樓奴行業先？」

 

　　「唉，睇樓期間見到心儀單位，正常你都會講下價架啦，咁agent問我地做盛行，話幫我地問下業主可唔可以平少少，點知agent當晚就話業主唔租畀我地喎……」

 

　　「吓？點解啊？」

 

　　「因為我老公做公務員…」

 

　　「公務員唔係應該更加願意租畀你咩？收入穩定喎！」

 

　　「佢話因為我老公係警察……」

 

 

　　最怕空氣突然安靜～靜左嘅呢幾秒，大家都明白發生緊咩事。同事仲後補一句：「甚至之後我地再睇樓，一啲就話唔租畀我地、一啲就態度惡劣話唔會平畀警察，受盡歧視……所以咪決定幾衰仔都要問屋企借首期買樓囉……」

 

 

　　聽完同事呢個可悲嘅故事，我有一刻覺得難以置信。難以置信在政府製造出黎嘅禍，竟然要前線員工去受；難以置信在，究竟呢個政府有幾失敗，先會迫到社會大眾「連錢都唔賺，我就係要hard time你」；難以置信在，我一廂情願以為同事都係「無父蔭一族」，原來只有我一個先係…….睇嚟如果我想上車，必須要先搵一個警察男朋友！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票