《Online有話兒》「特斯拉殺手」今晚上市，Rivian有乜咁把炮？

　　有「特斯拉殺手」之稱嘅電動汽車生產商Rivian將會今晚登陸納斯達克交易所，IPO定價78美元，高出指導價範圍，而呢次IPO係今年最大規模嘅集資上市，亦都係美股歷史規模上第六大IPO，籌集金額高達110億美金，估值高達760億美金左右，究竟呢間公司有乜能耐可以做到「特斯拉殺手」咁把炮呢？

 

(shutterstock圖片)

 

亞馬遜為背後大金主，已經落單訂購十萬架

 

　　電動車熱潮席捲全球，而家好多傳統車廠都開始搞自己嘅電動車，由30幾萬至過百萬都有，真係豐儉由人。不過，畢竟傳統車廠係電動車方面都仲算係「初哥」，所以好多車廠出電動車都係雷聲大雨點小，但呢間Rivian原來都好大支嘢，皆因電商巨頭都持有20%Rivian股份，並且已經訂購10萬架Rivian電動貨車；而福特都持有Rivian超過5%的股份。

 

　　而公司預計今年12月開始出貨，預計首10部將會送達，其餘將會係2024年全部出貨。而亞馬遜向 Rivian 投入的至今已經有 13.45 億美元，未來 Rivian發展可能都同亞馬遜有好大合作空間。外界預計，蘋果推出自家電動車，特斯拉為目前電動車巨頭，當亞馬遜都加入戰場，相信未來十年電動車都有一番龍爭虎鬥！

 

主打SUV及貨車，售價由67500至70000美金不等

 

(官網圖片)

 

　　上一上Rivian官網睇，目前睇到佢賣緊兩款車，包括R1T及R1S，分別係貨卡車及SUB，最低售價分別為67500美元及70000美元，似乎係想走第二個戰場，避免同特斯拉有正面衝突。就算而家開始落單，都要到2022年1月先會收到貨。顏色方面就比起特斯拉多選擇好多啦，有成九隻咁多，不過除左白色同灰色之外，其他顏色要加1500至2500美金不等。

 

　　據了解，係電動貨卡車方面，馬力高達835匹，0至100都只係3秒就得，而官方表示單次充電之後，續航能力有314英里，等於約505公里。電車優勢就係扭力快起部強，不過架R1T虛續航能力都幾唔錯，睇怕同其他電動車相比可以爭一日之長短。另外，佢個貨卡車有個獨特設計，就係卡車底有一個「Gear Tunnel」，好似一個長條隧道咁，可以容納11立方，放個高爾夫球袋又得；或者加Option的話，呢條Tunnel可以放套基本廚房用具，包括電池爐等，方便你去野餐旅行；而個Tunnel蓋都可以當凳坐，承重300磅，真係點玩都得！

 

Rivian超越特斯拉？貨卡車係美國更受歡迎！

 

 (shutterstock圖片)

 

　　至於點解可以叫得上「特斯拉殺手」，主要因為呢款貨卡車不論扭力同續行都比得上特斯拉之餘，貨卡車呢種車款長期都係美國汽車銷售榜首，皆因可以再貨之餘，又可以加條索纜拉多一卡車，對於喜歡旅居嘅人來說，拉多一卡旅居貨櫃，入面放個雪櫃電視機，又再係架R1T拎電，真係去遠小小都唔怕！

 

　　至於今日上市股價就係78蚊美金，第日會唔會上到幾百至千幾美金呢？學連登仔兩句金句就係：「有買貴無買錯」同埋「今日高位明日低位」。投資未來啊嘛！

 

撰文:李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇