今篇本來都係諗住寫下直選選情，一來讀者個個都有得投票，二來直選唔同功能組別；功能組別話就話有部分係有競爭，但實際上競爭真係非常細，除咗一兩個界別係有得爭下之外，其他都可以話係預知賽果。

　　其中一個充滿變數功能組別就係金融服務界。

　　金融服務界三個候選人，競逐連任既張華峰之外，仲有憑著老竇詹培忠(前金融服務界議員)係界內人氣急升既「詹仔」詹劍崙，另外仲有一位唔多人熟識既徐聯安。

　　係提名期完結之前，唔少界內人士都話張華峰連任機會好大，因為過去四年張華峰未必領到咩大功，但總算係中規中矩，無乜過錯。不過，噚日(10日)見到張華峰出來見記者講咗幾句有關「上市監管諮詢」既議題，珍盈就相信，張華峰應該開始聞到陣「除」。

　　上市監管諮詢，可以話係證券界頭等大事，唔少重量級人物都先後開腔反對。奇就奇在，張華峰作為業界代表，一開始時好明顯係站在證監一方，仲話睇唔到證監係奪去港交所(00388)上市職能既權力。其後張更加係專欄多次申述佢既觀點，仲同其他專欄作家爆發筆戰，張既立場就更加明確。但根據佢噚日所述，包括「對諮詢文件無既定立場，澄清自己以往並無表明支持諮詢文件」同埋「現時大部分業界均反對諮詢，料有關改革未必可通過」，呢個就算唔係180度轉軚，都肯定係向業界發出新訊息，「我地係同一陣線，唔係站在證監一方」。

　　珍盈聽聞，詹仔報名參選之後，就係專攻張華峰在上市監管諮詢呢個曖昧立場，去拜訪選民時都不段強調自己會極力反對證監。有證券界中人甚至透露，係業界既飯局之中，唔少行家都公開對張華峰既立場「鞭撻」，難以想像一個代表業界既人可以唔為業界發聲，對抗共同敵人證監會。

　　雖然張係全國政協，有阿爺係背後力撐，但界內中資背景選民都未佔到多數，要繼續坐係立法會，必然要得到本地行家支持先得。上屆張華峰「僅僅熟」以6票贏咗現任港交所非執董李君豪，今屆票數估計都想當緊張。邊個坐入議事堂，就要睇張華峰今次華麗轉身重拾行家既信任。

*編者按:立法會換屆選舉，金融服務界參選名單:張華峰、徐聯安、詹劍崙。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情