美洲人撐美洲隊

　　蘇亞雷斯又再次咬人，響香港真係人見人憎，家陣個個大義滅親，連利物浦fans都睇唔過眼，唔想再見到佢響球場出現咁話。

 

球迷相信四年後日本可以捲土重來，但冇人知到時蘇亞雷斯仲有冇得踢。

 

　　仲記得上屆南非世盃，「蘇7」又係風雲人物，出「魔鬼之手」救波令烏拉圭贏咗當時最後一支非洲隊加納，可以入到四強，但亦因為咁佢畀成個非洲列為黑名單！

 

　　好嘞今屆又嚟料，出番棚牙做秘密武器，一啖咬落基亞連尼個背脊，仲留咗大大個牙印。其實球場咬人事件真係好少見，仲難得一見係球證當見唔到，咁都畀佢走得甩，最後仲贏埋意大利入16強！

 

　　咁巴西呢邊嘅反應，又冇香港咁大喎。嗱，呢個就真係親疏有別！今屆世盃有美洲人搞party feel，自己人梗係支持自己人，所以呢度球迷逢事必撐巴西外，就會順便撐埋其他美洲隊，呢場烏拉圭對意大利，響街頭大電視睇波嘅中立fans，大部分都撐烏拉圭，佢哋都唔介意將世界盃變做美洲國家盃，目的就係要將世界盃留響美洲。

 

　　有咁嘅心態，「蘇7」呢啲蠢事又邊有巴西人介意，最緊要係烏拉圭贏波。不過就唔到國際足協呢唔做嘢，我認為佢餘下比賽應該會被罰冇得再上陣，先可以稍為擺平怨氣。你唔認都冇用嘞，再見，蘇亞雷斯！

 

　　同晚日本分組賽最後一戰大敗收場，我就去咗聖保羅一個日本社區活動一齊睇波，雖然最後出局，但一大班僑胞全場隔空打氣，可謂輸波唔輸陣。

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇