細個嗰陣，電視機日夜播住政府廣告，一隻全身綠色、滿佈紅斑點嘅怪獸，喺街上大搖大擺咁行，隨地吐痰、亂拋垃圾，被人人喊打，無公德心形象心入民心，呢隻怪獸叫「垃圾蟲」；到近幾年，有鑑於環境局局長黃錦星個樣太卡通，有人認為可以以佢個樣為基礎，設計一隻新嘅「吉祥物」，一隻頭重腳輕、全身啡色、聲音奇特嘅怪獸極度浪費、極不惜食，呢隻怪獸被稱為「大嘥鬼」。 

　　直到最近，港鐵為咗呼籲乘客喺車廂要放低背囊，諗起可以用吉祥物呢招嚟搶hit rate，於是就直接用人取代怪獸：一個孭住背囊、極乞人憎嘅乘客喺車廂左fing右fing，用背囊四招KO其他乘客，仲要非常得戚。宣傳片就話， 孭背囊嘅人要「孭得起，放得低」，應該將背囊擺喺地下，唔好阻住人。呢條片稱呼佢哋做「孭嘢人」。

　　作為「孭嘢人」一族，我睇完呢條片之後，我都覺得片中嗰位「孭嘢人」好乞人憎，我都好憎，直情覺得人人得而誅之，但係同返身邊朋友傾起，其實有幾多人係曾經喺地鐵車廂因為被背囊撞到，而發生不愉快經歷呢？少之又少。反而有唔少人係畀拖喼嘅人撞過，或者畀喼個碌碌過隻腳；甚至乎有朋友話，腋下有臭味嘅乘客更加令人困擾…….

　　背囊撞到人，呢個係一個問題，要提倡解決，呢樣嘢港鐵並冇做錯。但係個手法同埋優次，就係今次問題嘅癥結所在。

　　誠然，喺外地唔少大城市，都有做到呢啲呼籲，例如巴黎就將背包客描繪為一隻好似忍者龜咁嘅形象，背囊就好似龜背咁，阻到人，係咪比較易入口呢？見仁見智。但係港鐵今次係喺無其他配套或者公眾睇到嘅宣傳策略之下，就咁喺網上發放呢條宣傳片，而手法係選擇誇大、妖魔化，真係令我諗起文章開頭提及嘅「垃圾蟲」同埋「大嘥鬼」，但係只係冇放低背囊，就要被誇大到呢個程度？呢個係唔少人嘅疑問，亦直接令到好事變壞事。 

　　其次，睇完條片，就會諗起一個問題，咁拖喼嘅人呢？點解從冇見過港鐵拍宣傳片反映實況？尤其是每日搭東鐵線嘅朋友，困擾大家嘅大件行李好少可係背囊，反而係一件件貨物，點解咁多年嚟，港鐵咁少倡導乘客注意自己件貨會唔會撞到人？

　　不過，今次不失為一個「成功」嘅宣傳策略嚟嘅，一條片就激起咁多人討論，正反兩邊又鬧交啦，孭嘢人入地鐵又會忌三分，呢個可能就係大型機構而家想得到嘅公關效果。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情