《魚缸博客》泡泡瑪特（０９９９２）今日（２３日）暴升，高開１３％，升幅一度飆兩成，最高見過７６﹒７銀，創自２０２１年７月２日新高。　　公司噚晚（２２日）公布第三季度業績，今年第三季度整體收益（未經審核）按年增長１２０％－１２５％，其中內地收益按年增長５５％－６０％，港澳台及海外收益按年增長４４０％－４４５％。泡泡瑪特業績力證當前神州零售企業大趨勢：挖掘內需不如走出國門。　　盲盒經濟近年橫空出世，如今大部分知名動畫ＩＰ都紛紛推出盲盒公仔，ＩＰ經濟疊加抽獎元素就已經夠殺食，如果好彩抽到隱藏款仲可以炒賣提案，啱晒現代人胃口。泡泡瑪特除咗獨特嘅盲盒經濟模式之後，其自家ＩＰ都有吸金能力。由香港的比利時籍藝術家龍家昇設計毛茸茸角色Ｌａｂｕｂｕ，喺韓團ＢＬＡＣＫＰＩＮＫ成員Ｌｉｓａ嘅ＩＧ出現過後，即刻成為潮流ｉｃｏｎ，喺東南亞尤其係Ｌｉｓａ老家泰國嘅熱度獲大幅提升。　　今年７月，泰國政府一眾高官無懼酷暑，特登喺曼谷機場接機，為Ｌａｂｕｂｕ舉辦一個盛大嘅歡迎儀式，並授予Ｌａｂｕｂｕ「神奇泰國體驗官」榮譽稱號，認真「泰有面子」！　　講番技術面，泡泡瑪特績後表現強勁，不過出現咁大個裂口，短線可能會回吐，遲啲要補返裂口。泡泡瑪特今日啱好處於２０２１年６、７月的雙頂阻力，上升可能受阻，建議等裂口底部先好買入，目標價約６３﹒５銀。博客長線非常睇好泡泡瑪特嘅表現，縱觀泡泡瑪特升勢幾乎沿著１０天線走，走勢極強，而且泡泡瑪特嘅出海業績表現唔錯，可以期待下第四季業績再炒多轉。　《編者按》本欄搜羅即市傳聞，惟消息未經證實，《經濟通》亦不保證內容之準確性。

樂本健【年度感謝祭】維柏健及natural Factors全線2件7折► 了解詳情