其實去到呢步，博客都無咩好講囉，環球股市日日跌，好似昨日（8日）美股道指反彈成千點都可以變低收300點，其實已經進入緊恐慌性拋售，無咩好質疑。

　　港股呢一邊，就似乎真係有國家隊進場，今日（9日）低開六百幾點之後跌幅收窄，不過博客認為，北水救港股同水瓜打狗一樣，都係俾大鱷不停換碼洗碼賺鋪勁，對大市作用不大，純粹係唔會造成恐慌性拋售。

　　呢次由關稅引起嘅金融恐慌，博客認為侵侵有心而為之，皆因美股估值來講，一路都相當之高，與其要等個泡沫自己爆，不如自己督破佢仲好，起碼可以係自己控制範圍之內，有起事上來都可以一早制定政策。

　　港股呢邊呢？博客仲記得，大半個月前大家仲討論緊港股係咪進入牛市，有啲話睇定少少、有啲話已經入左牛市。當時博客睇到，心諗你地好似唔識睇國際新聞咁嘅？成個股市跌浪開始就係從上一屆侵侵上任開始，香港股樓雙殺，跌嘅跌死嘅死，呢次俾侵做埋最後一屆總統，仲唔同你玩轉個PARTY？仲對股市有正面睇法？而家個個無聲出啦。

　　呢個時候，我地呢班散兵游勇有乜好做？就係乜都唔好做，熄APP、唔睇新聞、避開報紙攤，緣分到了，股價自然會回升。現金為王先係最緊要，人生最慘並唔係成副身家輸清光，而係當你見到個市好似係谷底個陣，自己竟然無錢買貨。

　　其實大跌市係一個好好嘅過濾網，當跌到谷底個陣，仍然企喺到不倒嘅科技股，就係最佳的股份。好似上一輪「DOT COM」熱潮咁，GOOGLE、亞馬遜呢班企得穩，就變成今日嘅大佬，所以唔使急，讓子彈飛一陣先啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》被欺凌 | 姜大衛兒子姜卓文分享年少經歷，長大如何走出無自信、隱藏自已的陰霾？► 即睇