美股臨到第一季最後一個交易日，道指同標普就拗升返些少，但都扭轉唔到三大指數全月要跌嘅事實。侵侵被大批侵粉擁護執政，大家都期望佢可以為花旗國帶來變革，可惜過咗幾個月，大家只係見到侵侵如同唐吉訶德大戰風車嘅拙劣演出，內政亂成一鍋粥，外交變成大斷交，所有爭端都用關稅處理，最驚問題無解決，反而導致國內通脹節節高，咁就真係荒誕啦。

　　一直吹噓自己交友廣闊嘅侵侵，豪言要喺上任一日內解決俄烏問題，結果先喺公開場合同澤連斯基爭執，後又俾普京大帝請食檸檬，兩邊不是人，如果事件處理唔好，甚至削弱美國喺全球勢力，就將會係侵侵第二個任期嘅最大敗筆！

　　話說侵侵好不容易逼到烏克蘭總統澤連斯基同意30日停火協議，以為戰事可以迎來轉機，點知另一邊廂普京拒絕停火，令自稱同普京好熟嘅侵侵落唔到台，媒體直頭形容特朗普喺停火談判上對普京係「非常憤怒」。其實俄羅斯喺俄烏戰爭上付出咗太多代價，普京為咗維護自己嘅強人形象，除非有足夠利益，否則就算戰鬥到最後一兵一卒，都唔會示弱，如果侵侵真係了解自己嘅對手，就唔會作出咁魯莽嘅判斷啦。

　　而特朗普「非常憤怒」之後，就威脅普京如果不同意停火，就會對俄羅斯石油買家徵收25%到50%嘅連帶關稅，以彌補佢嘅損失。呢一句劈落嚟就即時令到紐油擠高咗3%重上70美元之上，俄羅斯嘅經濟命脈離唔開油氣資源，但喺被歐美經濟制裁多年後，早就搵到一條勉強存活嘅生路，石油再被收多幾成關稅，又算得咩呢？

　　特朗普一心盤算如果可以促成俄烏停火，一方面油價可以下降，商業成本下降同時令美國通脹風險減低，另一方面又可以攞到烏克蘭稀土開採權，係一石幾鳥嘅做法，可惜佢唔記得外交唔係做生意，唔係個個都係講錢，施展「談判藝術」嘅前提，係對方願意坐上談判席。

《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》《說說心理話》被欺凌 | 姜大衛兒子姜卓文分享年少經歷，長大如何走出無自信、隱藏自已的陰霾？► 即睇