話說近期財經界又有單熱門話題，就係隔離網台嗰位大師，當眾同主持人粗口對罵，內容就係大概話主持人屈佢，喺外間聽埋聽埋好多「假言假語」，就話係大師所講；明明大師係隔離又唔問，搞到主持都唔知好嬲定好笑。

　　反正呢單花生料就上晒討論區熱門，YT都有條精華片，大家都可以上去一搵就搵到。

　　究竟主持有無屈到大師，我相信網民自有公論。不過大師出名「硬頸」就人所共知，而且大師一直都係「恒指好友」，年年都話恒指大反彈，睇返2023年12月報道，大師話2024年恒指會到四萬點，其中兩大因素係，中國經濟向好以及人民幣轉強。

　　今日係2024年12月月中，中經會都開完，市場反應睇得出對中經會好似無咩火藥，恒指都跌到兩萬關；而人民幣坊間有個講法，就係為應付關稅問題，阿爺有意讓人民幣貶值，反正而家人民幣兌港幣都就快一換一，香港人北上笑哈哈。

　　大師長期被人當係「燈神」，網民已經習慣，正所謂壞咗嘅鐘每日都會準兩次，大師年年都話「恒指四萬點」，總會有一年上到去啩，總之講廿年有一年中，就係叻仔啦。

　　而家距離年尾仲有半個月，大概仲有10個交易日左右，每日升2000點，就好快到四萬點！你點知聽日會升2000點？唔知㗎，希望在明天吖嘛！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票