2022-06-09
被網民狂推跟鄧麗欣復合 方力申︰我哋兩個無嘢
【晴報專訊】方力申(小方)和鄧麗欣(Stephy)這對螢幕情侶曾拍拖十年,可惜16年分手;早前兩人定情作《獨家試愛》上映16周年,小方特別撰文感謝舊愛,事後不少網民力推二人復合。小方昨日出席公開活動,笑指網民只是「食花生」,又大爆他和Stephy的共同朋友亦經常「撥行扇」,但他強調跟舊愛已昇華到朋友關係。
小方恨拍拖恨到出面,但又呻藝人很難結識新朋友。
方力申昨日出席健康活動,今年已42歲的小方,自從與鄧麗欣分手後一直單身至今,雖然偶有緋聞,但都只是煲水新聞。父親節將至,問方爸爸可有追問兒子戀情?小方無奈說︰「無喎,佢放棄咗我好耐,我都好關注自己嘅感情,但真係搵唔到。(好難搵?)我覺得難呀,我哋做呢行,好難咁主動去識一個人,都係好被動,鍾意一個人,對方又要內外兼備,所以就更加難;如果溝通得唔好,拍拖都唔一定開心。」
早前小方與Stephy及友人聚會,問他跟舊愛再見可有感覺?小方即說︰「嘩,我唔敢答你呢啲咁details嘅問題,但我哋經常見面,幾個月就見一次,一年都見好幾次。(網民狂推你同Stephy復合?)佢哋食花生梗係啦!(你自己想唔想?)無諗呢啲,我哋出嚟永遠都係嗰班朋友,大家識咗十幾年,朋友都成日笑我哋,又會喺group send番以前啲合照出嚟。(雙方朋友想你哋復合?)都係食花生啫,我哋兩個都無嘢,淨係喺度笑。(無乜感覺?)朋友囉,我都好關心佢同佢媽咪嘅健康,過年過節都會傳短訊畀佢媽咪。」
鄧麗欣和小方拍拖十年,最後因了解而分手。(資料圖片)
曾屙血擔心患大腸癌
另外,小方昨日獲委任為大腸癌篩檢測試代言人,他透露39歲時首次做大腸檢查,但一年後發現大便出血,所以再作檢查。他說︰「我第一次檢查時有兩粒瘜肉,醫生幫我割咗,但年幾之後發現自己屙血,醫生叫我再檢查,發現我原來食咗麻辣火鍋,去廁所時有粒痔瘡爆咗,不過粒痔瘡喺裏面,所以唔使割。之後我都繼續食麻辣火鍋,無戒到。不過呢個年紀開始見盡生老病死,所以都注意身體,每兩年一次做身體檢查,驗血就一年驗一次。」
轉載自: 晴報
【你點睇】巴黎奧運正式閉幕,今屆你感到最深刻的地方是?► 立即投票