2022-01-24
《飯戲攻心》兩兄弟爭女 黃子華張繼聰飯枱上尋「激情」
【晴報專訊】黃子華和張繼聰在賀歲電影《飯戲攻心》中飾演異父異母的兄弟,更上演一幕兩男爭一女的戲碼,引發連串笑彈。子華透露拍攝這場爭女戲時,在場人士無不感到震驚,他形容過程雖然黐綫,但很合乎常理︰「呢場戲好激㗎,大家一定睇到嘩嘩聲。」
黃子華和張繼聰訪問期間火花四濺,笑聲不絕。
黃子華、張繼聰、鄧麗欣、王菀之、林明禎及陳湛文合演的《飯戲攻心》,因政府延長社交距離措施,而要押後上映。子華坦言無票房壓力,「依家(票房)有好多理由會唔好,好似上年連戲院都唔開,你幾叻都無用。」阿聰認同指演員只需做好本份,票房絕非他們能控制,「呢套戲係言之有物,講兄弟情,講家庭觀念。」
黃子華、張繼聰和王菀之等在戲中大放笑彈。
戲中,阿聰跟子華的前度鄧麗欣拍拖,並帶女友回家同居,新歡舊愛天天圍爐食飯。子華說:「有場戲講我同阿聰爭女,好激㗎,阿聰圍住飯枱好似演莎士比亞咁兜個圈去演,現場人嘅反應係『啲對白咁黐綫㗎』,但其實又好合理,佢拿捏得好好,總之大家一定會睇到嘩嘩聲。」拍攝期間,眾人均被對白引得發笑,就連「棟篤始祖」亦破功,子華說:「我都唔係成日忍到笑,但引人哋笑又唔同嘅。」
黃子華在戲中對前度鄧麗欣念念不忘。
叉燒代表香港式親情
電影以叉燒連繫子華、阿聰及三弟陳湛文的情誼,子華說:「叉燒係講緊家庭同城市,亦係香港好有味道嘅嘢。諗起叉燒大家會覺得好溫馨,所以我話呢套係溫暖激情嘅戲。」阿聰指叉燒雖不昂貴,但包含很多情感,「我哋去到外國,一定會好掛住香港嘅叉燒,勾起同邊個食叉燒嘅溫馨。」
現實中的阿聰育有一對子女,他指14歲兒子張瞻在家吃飯時,總是心不在焉:「阿仔成日覺得點解食餐飯要咁耐,有時仲會唔見咗人。我都經歷過佢呢個階段,我20至30歲嘅時候,大年初一都無跟父母去拜年;但到咗依家年紀,就好享受同家人相處。」未成家立室的子華亦喜歡過節,「新年一定會同長輩拜年,我算係傳統嘅人,節日本身就好人為,人生都好人為,如果唔係就無嘢做,當畀機會大家相聚。人生就係搵藉口畀大家開心,每日都應該畀啲原因自己開心,因為好多嘢都唔係必然。」
轉載自: 晴報
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇