2021-11-29
充滿愛的驚喜禮物 洪永城︰突然被安排出國留學
【晴報專訊】還有不足一個月便是聖誕節,不少人已開始購買聖誕禮物,送給摯愛親朋。收到禮物固然開心,感受送禮者的愛和心意更為窩心,未知以下一班藝人收過最特別、最驚喜的禮物又是甚麼呢?
Tony感激父母突如其來送上出國讀書的「禮物」,讓自己學會獨立。
洪永城(Tony)回想收過最好的禮物,就是十歲那年父母送他到新西蘭讀書,他說︰「嗰年阿媽突然同我講『你下個禮拜就要去新西蘭讀書』,當時有啲驚,因為自己讀書唔叻,不過嗰邊有親戚照顧,所以父母都好放心…我喺嗰邊讀咗八年中學,之後就返香港讀大學。」
Tony與太太Inez性格迥異,教導小朋友的方法亦有不同。(IG圖片)
問快將榮升爸爸的Tony,會否同樣讓自己的小朋友出國讀書?他表示︰「要負擔小朋友去外國讀書真係好難,我都仲有好幾年時間先去到呢步。到時再諗啦,可能嗰陣我唔捨得都未定。」他直言自己教導小朋友的態度比較惡,但太太梁諾妍(Inez)則較放鬆,兩人一凹一凸,互補不足。
黎諾懿 老婆送的「小春雞」
諾懿即將迎來第二胎,他直言這份「禮物」未算太大驚喜。
對黎諾懿來說,第一次當爸爸就是他收過最好的禮物,他憶述︰「嗰日老婆鬼鬼祟祟同我講『你就嚟做爸爸啦!』到依家我都仲好記得嗰個畫面,因為之後嘅人生就多咗個人仔,比起其他任何禮物都深刻。當時我就不斷諗,唔知呢個小朋友會唔會同自己一樣樣呢?」
諾懿一家三口十分溫馨。(IG圖片)
諾懿甜笑表示,四歲多的囝囝黎峰睿(小春雞)依然十分黐身,每次食飯都喜歡坐在自己大髀上,就算太太李潔瑩阻止,諾懿都會勸她︰「畀佢坐啦,仲坐得幾多年吖。」他又笑言︰「個仔好蠱惑,成日話錫媽媽多啲,但實際上鍾意黐住我,因為我會陪佢玩,又縱容佢做『壞事』。」
湯洛雯 一位男生的溫暖牌頸巾
靚湯指自己會好好收藏每一份禮物。
湯洛雯(靚湯)收過最難忘的禮物,是讀大學時一位男生親手織的溫暖牌頸巾,她表示︰「見佢嗰條頸巾有好多窿,都諗到佢應該織得好辛苦。收到呢一份禮物真係幾驚喜,因為我一向鍾意啲手工藝、DIY嘢,覺得呢一份禮物真係幾好。」
未知馬國明又會否送DIY禮物給靚湯呢?(IG圖片)
靚湯透露至今仍有好好收藏這條溫暖牌頸巾︰「我唔會隨便扔人哋嘅心意,有時都會拎出嚟睇下,但唔係回味…依家同對方仲有聯絡嘅,不過佢已經結咗婚㗎喇。」
王君馨 花14小時製忍者龜蛋糕
Grace談起老公時春風滿面。
王君馨(Grace)收過最驚喜的禮物,原來是由老公Daniel所贈,「嗰時我同佢仲係異地戀,有次佢嚟香港,其中一個喼剩係裝住一隻巨型啤啤熊!佢話驚我孤零零,所以送隻熊公仔陪我,依家隻啤啤熊仲放喺我哋間房。」
Grace和老公婚後依然不時為對方製造驚喜。(IG圖片)
不過Grace笑言兩年前親手焗製的忍者龜立體蛋糕,讓老公更為驚喜。Grace說︰「係佢嘅生日禮物,起初以為四、五個鐘就整好,點知最後足足用咗14個鐘。製作過程佢完全唔知,不過我有拍片…佢收到嗰刻好驚喜,仲話唔捨得食,呢件作品我都畀自己98分㗎!」
轉載自: 晴報
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票