2022-03-25
《MakeMoney》電動車熱炒三大主題,2022焦點所在!
呢幾年電動車發展進入白熱化階段,香港其實都引入電動車一段日子,但久久都未能普及,當中原因又係咩呢?而自去年起好多歐洲車廠都加入電動車市場,究竟2022年電動車會炒啲乜嘢主題呢?今集《MakeMoney》帶你進入電動車的世界!
熱炒焦點一:特斯拉4680電池生產階段,充電更快續行更高?
(shutterstock圖片)
今明兩年電動車相信會又再進化,特別係電池方面又再大躍進,其中特斯拉自家設計嘅「4680電池」就已經成為市場焦點啦!大家都知道,電動車嘅電池其實係由好多粒類似3A電芯所組成,過往特斯拉舊款所用嘅電池就係「2170」,即係21mmX70mm嘅圓柱體電池,每架車大概有4400粒左右。特斯拉好似見到電池商未有足夠技術研發更大容量嘅電池,因為物理上電池越大,電流越強,熱力都會越高,容易產生安全風險;而特斯拉自家研發嘅「無極耳技術」就簡單解決呢個問題。
簡單來講,過往電池都由正負極材料搭載兩條嘅「集流體」,再透過電池嘅「極耳」連接(電芯頂上面嘅一點小圓形),而電流就透過極耳輸出,由於電流只可以透過正負極嘅兩條「橋」通過,假如電流太大就會令到電池過熱;而特斯拉嘅「無極耳」其實就等於「全極耳」,其就將極耳由一點擴大至一個小圓形,而電流就可以透過個一圓形輸出,電流加大之後,電迴路速度更快、熱量更低,所以可以儲存嘅電量更高。
由於電量大左,好似新款ModelY咁,只需要搭載一千粒4680電池(46mmX80mm),令電池成本下降;而無極耳技術令電流加速之餘又降低熱力,第日充電速度可以更快,可能真係實現到10分鐘充滿電都唔出奇!
熱炒焦點二:換電派VS充電派
(shutterstock圖片)
今年農曆新年,內地高速公路出現一個有趣景象,就係大家都揸架新款電動車返鄉下威威,點知行到一半已經無電,走去電動車站排隊充電,排四個鐘然後充一個鐘,分分鐘慢過揸燃油車。所以電動車行業經常熱話就係,究竟電動車應該用充電好定換電好。皆因充電車跑長途時,完全唔符合經濟效益,亦減慢大家換車意欲,香港就係一個好例子,充電站不足令到市民換電動車意欲不強,縱使有「一換一」計劃都未能鼓勵到車主從燃油車換電動車。
其實內地電動車中,「換電派」電動車同樣較受歡迎,而表表者就係「蔚來汽車」,而蔚來更首次提出「汽車」同「電池」分開購買嘅概念。例如蔚來汽車最平一款車嘅指導價約39萬人仔,假如你唔買電池就可以減價7萬人仔;車主可以選擇向蔚來以月租980蚊價錢租用電池,任用唔嬲;當然,你買埋個電池,都係終身免費換電,而且不限次數,全國國內有站就可以走去換。
「換電派」好處在於,換舊電池五分鐘搞掂,同入油價錢差唔多;對於車主而言,如果電池升級的話,就可以立即享受到好處。目前蔚來係中國有300座換電站,預計2022年至2025年係中國每年新增600座換電站;2025年底前全球將有4000座蔚來換電站,其中海外市場換電站約有1000座,真係勢不可擋啊!
熱炒焦點三:大廠細廠加入戰團,車價勢必下跌,毛利將受考驗
(shutterstock圖片)
由於歐洲有國家開始禁止燃油車落地計劃,所以歐洲傳統汽車大廠都開始加入電動車戰團,其中德國將會成為主要戰場,因為特斯拉剛剛係德國起好超級工廠,有望稱霸歐洲電動車市場。
據數據分析指出,係2021年18個歐洲新車銷售市場當中,有兩成係電動車,而柴油混合、純柴油車佔比不夠19%,係電動車首次跑贏柴油車銷售;而德國市民購買4萬歐元以下電動車,可以享受到9000歐元的補助,預計可以推到當地換車熱潮。
不過,咁多傳統大廠都話要加入電動車市場,勢必影響到傳統電動車廠銷售,有分析師指出,隨住歐洲多間傳統燃油車車廠加入電動車市場,雖然未必可以立即追起特斯拉等龍頭大佬,不過可能會出現價格戰嘅情況出現,民眾換車可以享受到價格戰的紅利,但對車廠而言,毛利將會受到考驗,特別係中國電動車車價本身已經低廉,預計電動車價格價將會係今明兩年開始出現白熱化。
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇