2020-12-15
《Make Money》虛擬銀行乜東東?高息存款你要知!
呢一年真係成個世界變晒,大家都習慣上網買嘢、用Apps叫外賣,只要有手機在手,真係可以足不出戶!而香港今年終於有虛擬銀行推出服務,究竟「虛擬」嘅銀行同傳統銀行有咩分別?如果要做存款及定期又點算呢?今日就深入淺出咁教大家點樣用虛銀Make Money啦!
(Shutterstock圖片)
虛銀開戶唔使排隊,一部手機做晒所有步驟!
叫得做「虛擬銀行」,第一個條件就梗係「唔存在」啦!講緊嘅係虛銀係無實體銀行分店,所有存款轉帳都係靠手機搞掂,同一般銀行嘅網上服務都係大同小異!不過虛銀有多個好處,就係用一部手機就可以開戶,只要輸入自己個人資料,同埋影自己嘅身分證,筆者實測只要5分鐘就完成,真係快過睇醫生!對比起傳統銀行,又要預約又要排隊,又要地址證明又要等勁耐,真係夠晒方便!
以「眾安銀行」為例,筆者自己嘗試過開戶,只要有香港身分證以及夠18歲,再輸入自己屋企地址,整個過程只需要5分鐘就可以,連住址證明都唔使Upload,而且即開即用。
虛銀核心概念其實係想拋棄紙張貨幣,利用手機、電腦就可以做到交易同付款,所以「科技白癡」可能要畀多啲心機學習;加上虛銀係無實體銀行,所以要拎錢入錢必須由其他銀行進行,又或者使用「轉數快」先享受到服務。另外,部分虛銀會送一張「記帳卡」畀你,等你係本地各大銀行有「銀聯」、「Visa」嘅ATM提款機拎錢。
高息鬥搶客,活期出到五厘息咁跨張?
好似「全民造星」入面嘅花姐成日賣廣告嘅天星銀行,強調有活期5厘息口,但底下備註寫明只適合首2萬蚊,真係要金睛火眼呢!(官方網站圖片)
虛擬銀行為咗同實體銀行銀行搶客,成日都會以「高息存款」作招徠,其中有銀行以「活期5厘」吸客!果然為咗吸存款無所不用其極!現時好幾間虛銀活期息口都係1%至5%之間,比起實體銀行接近零息又真係好好多,不過留意返,通常所謂「高息活期」都係有啲「特別細則」,例如只限頭兩萬蚊有呢個優惠,或者可能係一啲短期存款先可以畀到咁高息口,所以係咪值得將啲錢調來調去就要仔細思考啦!
搵銀行開戶記得用經濟通嘅Apps格下價先啦!
另外,虛銀係無存款最低結餘,而且同傳統銀行一樣會參加存款保障計劃,存款有最高50萬保障,所以真係唔使驚會出事啦!如果想知道各大銀行息口比較,其實都可以打開我哋經濟通嘅Apps,入面有齊晒本港咁多間銀行息口比較,連虛銀利率都有齊晒!只要打開Apps然後去「財經」-「外匯」-「定存息率」,就可以一覽無遺啦!仲有港元、人仔同美金息口比較,咁就真係可以貨比三家啦!
虛銀仍處於起步階段,分散開戶降風險
(Shutterstock圖片)
要求咁高嘅香港人,可能暫時都未必有咁大意欲開個虛銀帳戶,因為目前大部分虛銀只有存取服務、交易等功能,對比起傳統銀行網上服務,咩買股票、做借貸、樓按等等,係差小小嘅。不過正正就係因為虛銀唔需要實體店同人手,令到成本下降,加上又唔使排隊,24小時服務等因素,都成為虛銀嘅優勢!
不過留意返,虛銀嘅安全問題一直都被人談及,曾經因為有虛銀受到Ddos(阻斷服務)攻擊,而導致網站同Apps都死晒機,急住用錢真係會死得人!所以最安全計,開多幾個戶口,將自己啲分開幾個戶口儲存就分散風險啦!另外一點,就係如果想賺虛銀嘅高利率存款,記得留意係短期定長期息率,儲款有無上限等因素,詳情就要問返各大虛銀嘅線上客服啦!
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票