《Make Money》買金好定買銀好？金行買定銀行買好？

　　上一篇講過，貴金屬價格其實睇需求而定。除咗賣金外，近期連白銀價格都抽高，究竟呢期買金好定買銀好呢？我哋再搵永豐金融Mark To同大家分折！

 

（Daren攝）

白銀炒落後，投機味道濃

 

（Shutterstock圖片）

　　阿Mark 所講，呢期白銀價格抽高，主要因為投資者憧憬銀價有望追落後，例如2011年4月25日銀價歷史高位49﹒8美元，現在金價早已收復失地，超越當年高位1912美元水平，在1950美元附近徘徊，但銀價仍停留喺26至28美元之間，故不少投資者期望起碼可升至35美元或以上。

　　當然，呢個比例唔係絕對嘅，尤其考慮到白銀的工業需求較以往小，唔可以一成不變；但唔少投資者都以白銀作為投資甚至投機的工具，白銀價格由今年3月時大概12美元／盎司，升到而家28美元／盎司，足足升逾1倍！

買賣貴金屬去金行買，星期六日都開門！

 

（Daren攝）

　　以前阿媽個年代，覺得買實體貴金屬保管好麻煩，就會喺銀行開個「金簿仔」，然後用呢個金簿仔買賣黃金，不過就無得存入黃金或者拎金走，只係可以拎返交易當時報價的金額，而且又無息收，差價又大，不過勝在夠安全！
　　

　　不過，今天都2020年啦，走去排銀行隊真係又慢又浪費時間，況且銀行買黃金好多時只係做到四點半。另邊廂，唔少金行推出網上服務，而且星期六、日都開門，真係24小時都可以買！而好多人走去金行買賣嘅另一原因，係因為銀行近年來已經少做黃金買賣啦！不過阿Mark 提醒投資者，金行雖然彈性較大，但喺星期六日買賣價差亦較闊。

999金同9999金有係唔係FD？，金飾回收折讓較金粒大！

 

（Shutterstock圖片）
　　

　　黃金有分「999金」同「9999金」，究竟差隻「9」，又差喺邊呢？阿Mark 表示，所謂「四條九」又叫「千足純金」，即係黃金純度，係入面只有萬分之一嘅雜質；而「三條九」就有千分一嘅雜質。喺目前技術下，黃金重未做到100％純金。當然，純Ｄ梗好Ｄ，「四條九」好過「三條九」啦！

　　咁金飾同金粒回收價又點呢？據阿Mark 所講，目前金行回收折讓差價都幾大，因為成本同火耗都唔一樣。佢又舉例，回收飾金價16740蚊／両，與金行金粒價17470蚊／両相比，差距就有730蚊，所以金飾始終有較大的耗費，買入較貴，回收價較低，投資時候就要諗清楚啦！但當然，要定情嘅，梗要搵Ｄ獨一無二嘅金飾嘅。

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情