切勿只在殯儀館見

　　不時有人問我：「究竟你個『快樂傳媒老是佛團』，有啲乜人嘅呢？」

　

　　好啦，反正此乃開心團體，一於公布名單！包括：（大致按年紀） 何定鈞、吳錫輝、關偉、潘啟迪、陳家耀、張文新、鄭明仁、盧炳松、曾智華、曾展章、陳早標、施永遠、羅燦及陳景祥。

 

「快樂傳媒老是佛」初成立只有十人。

大家聚會無所不談，最近一次交換腰痛經驗。

　

　　這群現今及昔日的傳媒管理人，因共同擁有自由傳媒氣氛下的成長經歷（七十年代至今），故此，價值觀相若，個個曾第一身見證香港五十年來的各種變化。

　

　　傳媒人天性：客觀、愛玩、抽離、凡事「見慣不怪」，只會分析及批判，絕不沉迷激進政治立場（如乃違反客觀大原則）。兼且，個個見慣權貴，甚麼人也冇有怕，絕不見高拜見低踩，只有基本互相尊重，絕冇需要擦鞋討好。

 

「老是佛」65-75歲，但個個樂觀、豁達，見盡香港變遷，對時事慣性以抽離態度分析。

　

　　這個「快樂團」由小弟十多年前「吹BB」組成。點解歷盡咁多「香港大事」都冇似不少老友群組咁先「分顏色」，再道不同而散檔呢？

　

　　無他，因大家皆堅守基本傳媒道德底線，見到任何變化，仍絕不跟紅頂白，只以香港大利益出發作思維，同聲同氣也。

　

　　大家人生中，有幾多個組合是志同道合而歷久不衰的呢？行到六七十歲，心照嘞。

　

　　十多年前，「快樂傳媒老是佛」初創立時，成員位位仍各據傳媒重要位置，忙到飛起。小弟定下飯局期為三個月一次。其時聚會，因各忙各，絕少可以齊人。

　

　　但隨著一個又一個退休，一個又一個空閒時間多了，一個又一個體會到人生珍貴感情與時刻可能稍縱即逝。於是，大家決定，「加密班次」到每月一聚。

　

　　就咁，小弟忙到甩轆，因負責每次安排一間新架步俾各老是佛大飽口福。幸而，我百足咁多爪，冇問題之至。

 

每次飯後，例必感謝大廚並拍照留念，保證下次有好嘢歎。

　

　　前晚，又一快樂飯局完畢，與曾展章漫步街頭。佢話：「我同老婆大姐明（林建明）近月不時要送殮，因圈中老友排隊上天堂。有觸而發，佢次次皆同我講：『老公，凡屬老友的，要多點見嘞。若次次只在殯儀館見（大家來送殯），幾無意義呢。唔好彩，更可能變成「被送」的一個。 總之，有情有緣者，唔好坐喺度等，主動多組織快樂飯局啦！』」

 

「大姐明」提示丈夫曾展章，老朋友要多見，切勿次次只「在殯儀館見」！

 

　　百分百同意！下次「快樂傳媒老是佛」飯局主題——恭賀「輝哥」吳錫輝七十大壽！

 

我與輝哥皆拿手搵美食。

下次聚會，賀輝哥七十大壽。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票