2020-09-22Photo: 圖片由作者提供
兩句管理人大忌說話
1995年,上司指派小弟出任香港電台第二台總監。其時,此頻道屬「全港最受歡迎」。做總監,好似好風光,其實要日日打收聽率大戰,壓力之沉重,瞓著標冷汗。結果,就壓出抑鬱症了。食得鹹魚抵得渴,無怨無悔。
做最受歡迎電台總監,表面風光,後果是硬食高壓而出現的嚴重抑鬱病。
做總監,即是一個台的「阿頭」,要管理的,包括N個著名監製及明星級DJ。個個有自己的獨特性格,恍似一個「馬戲團」。班主如何保證大家每日有水準演出,極考功力。
電台就如一個馬戲班,「猛獸」如雲,要令佢哋全部日日有水準演出,極考功夫。
事實,管監製(公務員)及管DJ(藝員),手法絕對不同。我喜歡放權式管理,即只管幾個資深監製,再由佢哋管普通監製及DJ。
管人,若下下在會議室行使權威,欠缺「人性化」,效果多不理想。尤其涉及創作行業,最好營造輕鬆自由氣氛去傳遞指令。
昔日香港電台,由吳錫輝開始到張文新再到我,皆喜歡「酒吧管理學」。即與同事揸住杯大啤天南地北交流中暗暗下達指令。
七、八十年代三大電台巨頭,吳錫輝、朱培慶及張文新,絕冇「教曉徒底冇師傅」迂腐思想,結果培育出大量廣播明星,自己亦升至最高的管理層。
當年,小弟要求旗下監製,切戒講兩句說話:一、教曉徒弟無師傅;二、呢個世界冇咗邊個都得!
第一句,代表冇自信,心胸狹窄,為任何管理人大忌。尤其公務員,多會做一生一世,循序漸進升級。升級快慢,上司重要考量,為看你是否積極培養接班人!即你在工作中,越教曉得多徒弟,就越快晉升。另外,成日驚畀人爬頭,閃閃縮縮,下屬必定唔服你,鄙視你欠缺領導胸襟。
第二句,則可以看出管理人的思考水平。正是「呢個世界,冇咗邊個都得」。
對,重要如毛澤東、鄧小平、林肯、華盛頓、曼德拉……有邊個離開後,地球停止轉?冇!
所以,呢類「阿媽係女人」道理,要切戒講出口,因太低層次了!
任何偉人都有離開的一天,「冇邊個都得」,乃「阿媽係女人」低層次道理。高層次思維,應是評估冇咗/有咗邊個帶來的正/負面影響。
尤其,更忌對DJ明星講,因會傷盡佢哋心。作為監製,講呢類說話去刺激人,實屬冇腦。
電台明星各有性格,管理策略因人而施。
管理人的思量,應該如何?應該是——沒有了誰或誰,將對團隊有甚麼影響?
超級球隊,沒有了C朗及美斯,當然仍是球隊。但能否仍是超級球隊?食腦的領隊,一定有深層次的盤算,絕不會胡亂「大」球星話冇咗邊個都得,摧毀佢哋自尊自信,對誰有利?
管電台,同理,魅力DJ就是最大資產,絕不可能在佢哋面前講:「冇咗邊個都掂!」
如此口不擇言,肯定不會是成功管理人。
我已退休,希望接棒者也明管理的基本精神。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【與拍賣官看藝術】常玉作品屢創天價,背後其實藏著跌宕起伏的人生► 即睇