【營銷心法】善用「次一級產品」發揮「誘餌效應」，增加Hero Product銷路！

　　早前專欄「營銷心法」一文中，有讀者朋友對當中「中、大、特大」嘅概念感到興趣。讀者曾任職小型咖啡店職員，指出「大杯」同「特大杯」嘅銷量其實差不多，問及當中係咪仲有其他營銷手法。

　　咖啡店餐牌上通常只會寫上「中、大、特大」嘅選項，當中有兩個營銷技巧，前文只提及其中一個手法係，先剔除「細杯」選項，令你少一個選擇，再將「大杯」變成中間選項，並改一改名，引導消費者選擇大杯而非中杯。另一方面，其實喺咖啡升級嘅定價上都藏著小竅妙。先假設中杯為$32，大杯$36，特大$39，中/大杯差價為$4，而大/特大差價就只有$3，當消費者選擇中間選項（大杯）時，但見到原來大杯升級到特大杯，係抵過中杯升級到大杯，呢一個比較就會左右佢哋嘅決定，令佢哋認為特大係三個選㨂中最抵飲，所以最後選擇特大杯。而呢一個類似「升級差價」嘅營銷手法，稱為「誘餌效應」。

　　「誘餌效應」意思係，當公司想向巿場力推一件A產品時，佢哋會同時間推出一個類似、但「次一級」嘅產品以作對比，突出A產品，令消費者覺得A產品係所有產品中最好，從而最後決定A產品。「次一級」產品唔一定係質素上較差，可以係價錢較貴、性價比較低、數量較少等等。所以「次一級」產品係用嚟陪跑，公司唔會對佢賺錢能力有所期望。而巿場上並唔難見到「誘餌效應」不同嘅展現，當中最常見例子如豬柳蛋包比豬柳包平，又或者係購買A產品單價為$100，B產品單價為$150，但A+B則只需$220。

　　另外外國有一成功例子，一間連鎖餐廳將自己「第二Hero Product」加價，價錢比「第一Hero Product」還要高、性價比亦十分低，旁人會以為餐廳「自己倒自己米」，但其實係想令消費者覺得「第一Hero Product」更加抵食，從而間接增加其銷量。

　　但其實「誘餌效應」並唔一定永遠適用，當產品開始有穩定銷量，或者有穩定客源，「常客」會有自己特有既定消費模式，佢哋會潛意識無視類似以上嘅手法，所以多數餐廳後期會將升級價錢統一，大/特大差價提升至$4，選擇「賺多一蚊得一蚊」。所以大家可能會見到同一間咖啡店，香港同世界各地分店嘅升級差價有異，呢個就係其中一個原因。

　　人類消費時較難理性地分析每一個選項嘅分別，尤其係對於一啲「享樂」產品，當消費者買緊一種快樂或「減少自身痛苦」嘅產品時，會更為鬆懈，好自然地用直覺去消費。所以消費者一定要了解自己需要，俾錢前再減去不必要對比同sales嘅花言巧語「升級特大『都只係』加多$3喎」，就會冇咁易跌落圈套。

Read more：【營銷心法】掌握客戶心理，將缺陷產品變成Hero Product！醒你3個營銷技巧

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票